Səhiyyə Nazirliyində 20 Yanvar şəhidlərinin xatirəsi anılmışdır
Bakı, 22 yanvar (AZƏRTAC). Səhiyyə Nazirliyində 20 Yanvar faciəsinin 24-cü ildönümünə həsr olunmuş tədbir keçirilmişdir.
Nazirliyin mətbuat xidmətindən AZƏRTAC-a bildirmişlər ki, tədbirdə 1990-cı il yanvarın 19-dan 20-nə keçən gecə keçmiş sovet ordusunun xüsusi təyinatlı dəstələrinin Bakıya yeridilməsinin və günahsız insanlara amansız divan tutulmasının bəşəriyyət tarixində ən qanlı səhifələrdən biri olduğu vurğulanmışdır.
Qeyd edilmişdir ki, 20 Yanvar hadisələri, həm də xalqımızın gücünü, mətinliyini və iradəsini nümayiş etdirmişdir. Buna baxmayaraq respublikamızın o zamankı rəhbərliyinin öz xalqı ilə birlikdə olmağa cəsarəti çatmamışdır. Qara Yanvarın həmin ağır və dəhşətli günlərində Azərbaycan xalqına qarşı soyqırımı aktının törədilməsini cəsarətlə bəyan edən ilk şəxs yalnız ümummilli lider Heydər Əliyev olmuşdur. Ümummilli Liderin yenidən Azərbaycanın rəhbərliyinə qayıtmasından sonra 20 Yanvar hadisələrinə hərtərəfli və obyektiv hüquqi-siyasi qiymət verilmişdir.
Tədbirdə, həmçinin Ümummilli Liderin siyasi kursunu uğurla davam etdirən Prezident İlham Əliyevin şəhid ailələrinə xüsusi diqqət ayırdığı vurğulanmışdır.
Sonda 20 Yanvar şəhidlərinin xatirəsi bir dəqiqəlik sükutla yad edilmişdir.
Bölmənin digər xəbərləri
