Şəkili xanım sənətkar keçə üzərində dahi Nizaminin qəhrəmanlarının obrazlarını yaradıb FOTO
Şəki, 24 oktyabr, Mustafa Dadaşov, AZƏRTAC
Sənətdə daim yeniliyə can atan Şəkinin tanınmış təkəlduz ustası Vəfa Mustafayeva son vaxtlar keçəçilik sənəti ilə təkəlduz tikmələrini birləşdirərək maraqlı tikmə nümunələri yaratmağa müvəffəq olub. Şəkili sənətkarın keçə üzərində işlədiyi yeni əsəri - dahi Azərbaycan şairi Nizami Gəncəvinin “Leyli və Məcnun” poemasının qəhrəmanlarının obrazları sənətsevərlər tərəfindən maraqla qarşılanıb.
Şəkili sənətkar AZƏRTAC-ın bölgə müxbiri ilə söhbətində yaratdığı yeni əsərin özəlliklərindən danışıb: “Dörd ilə yaxındır ki, bacım Aysellə birlikdə keçəçilik sənəti ilə məşğul oluruq. Keçənin hazırlanması çətin prosesdir, ona görə də bu sənətlə çox vaxt kişilər məşğul olurlar. Belə ki, yun yuyulur, təmizlənir, daranır, didilir. Sonra isti su və sabunla yoğrularaq istifadəyə hazır vəziyyətə gətirilir. Hamısı da ağır işdir. Sevinirəm ki, çətin də olsa, bacımla bu işin öhdəsindən gəlirik. Çalışırıq ki, elə mövzular seçək ki, həm insanları cəlb etsin, eyni zamanda, qədim tariximizi, zəngin mədəniyyətimizi, mədəni irsimizi özündə əks etdirsin”.
Ümumiyyətlə, Nizami Gəncəvi yaradıcılığının sehrli dünyası təkəlduz ustası Vəfa Mustafayevanın əsərlərində xüsusi yer tutur. Təsadüfi deyil ki, əl işlərinin kolleksiyasında dahi Nizaminin obrazlarının əks olunduğu onlarla əl işinə rast gəlmək mümkündür. Onun Leyli, Qeys, Xosrov, Şirin, Fərhad, Bəhram Gur və şairin digər qəhrəmanlarının əks olunduğu əl işləri, “Leyli və Məcnun”, “Xosrov və Şirin” poemalarından illüstrasiyalar emalatxanaya gələn yerli və xarici turistlərin böyük marağına səbəb olur. Bu əl işləri ilk baxışdan rəsm əsərlərinə oxşasa da, əslində hamısı bədii tikmədir.
Sənətkar Nizaminin “Leyli və Məcnun” əsərinə əvvəllər də müraciət edib. Onun dekorativ tikmə ilə işlədiyi Leyli və Məcnunun əks olunduğu təkəlduz əsəri iki il əvvəl, “Nizami Gəncəvi İli” çərçivəsində Almaniyada nəşr olunan kitabın cildinin üz hissəsində yer alıb.
“Emalatxanama gələn turistlər keçə sənətinə çox maraq göstərirlər. Bəzən dəqiqələrlə əsərlərin qarşısında dayanıb baxırlar. Öz-özümə deyirəm, bilsəydim ki, keçə sənətinə maraq böyükdür, təkəlduz sənətinə yenicə başladığım vaxtdan, yəni 20 il öncədən keçəçiliklə də məşğul olardım. Turistlər Xan Sarayının naxışlarının əks olunduğu işlərə daha çox maraq göstərirlər. Keçə üzərində işlədiyim “Dəmir yumruq” əsəri də hamının xoşuna gəlir”, - deyə xanım sənətkar vurğulayıb.
Bölmənin digər xəbərləri
