Belə ki, Bakı şəhəri Vergilər Departamentində vergi ödəyicisi kimi qeydiyyatda olan “Viktoriya-M” Məhdud Məsuliyyətli Cəmiyyətdə 2004-cü il mayın 1-dən 2005-ci il aprelin 1-dək olan dövrdə vergi orqanına təqdim olunmuş bəyannamələrə gəlirlər və xərclər barədə bilərəkdən təhrif olunmuş məlumatlar daxil etməklə, 128.260 AZN mənfəət vergisi, 960.000 AZN əlavə dəyər vergisi olmaqla, cəmi külli miqdar təşkil edən 1.080.000 AZN məbləğində vergiləri dövlət büdcəsinə ödəməkdən yayınma faktı müəyyən edilərək, Azərbaycan Respublikası Cinayət Məcəlləsinin 213.4-cü maddəsi ilə cinayət işi başlanmışdır.

İstintaq zamanı məlum olmuşdur ki, rəsmi sənədlərdə “Viktoriya-M” və “Aksu” Məhdud Məsuliyyətli Cəmiyyətlərin direktoru kimi göstərilmiş Poruz Xudan oğlu Abbasov 1991-ci il oktyabrın 23-də avtomobil qəzası nəticəsində ölməsinə baxmayaraq, “Texnikabank” Səhmdar Kommersiya Bankının “İnşaatçılar” filialının əməkdaşları tərəfindən onun adına “Aksu” Məhdud Məsuliyyətli Cəmiyyət üçün manat hesabı açılmış və 2004-cü ilin dekabrından 2005-ci ilin fevralınadək bu hesab üzrə 3.340.000 AZN məbləğində əməliyyatlar aparılmaqla, pul bütövlükdə bankdan ölmüş şəxsin adına çıxarılmışdır.

Bundan başqa, vəfat etmiş Poruz Abbasovun adına “Viktoriya-M” Məhdud Məsuliyyətli Cəmiyyət üçün “Texnikabank” Səhmdar Kommersiya Bankının “İnşaatçılar” filialında və “Turanbank” Səhmdar Kommersiya Bankının “Yasamal” filialında həmin bankların əməkdaşları tərəfindən manat hesabları açılmış və 2004-cü ilin iyun ayından sentyabradək bu hesablar üzrə 7.040.000 AZN məbləğində əməliyyatlar aparılmış, müxtəlif təşkilatlar tərəfindən köçürülmüş pullar mərhumun adına yazılmış çek vərəqləri ilə nağd qaydada bankdan çıxarılmışdır.

İstintaq zamanı bu cinayətlərin Lalə Arif qızı Əsgərova tərəfindən digər şəxslərlə əlbir olaraq törətdiyi müəyyən edilmişdir. Sübuta yetirilmişdir ki, Bakı Şəhəri Vergilər Departamentində qeydiyyata alınmış “Qlobal-A” Məhdud Məsuliyyətli Cəmiyyətinə faktiki rəhbərlik etmiş Lalə Əsgərova vergi ödəyicisi kimi Bakı Şəhəri Vergilər Departamentində qeydiyyata alınmış “Dəniz” Məhdud Məsuliyyətli Cəmiyyətinə faktiki rəhbərlik edərkən, 2002-ci il iyunun 6-dan 2003-cü il aprelin 1-dək olan dövrdə müxtəlif təşkilatlara mal-material satışından gəlir əldə etməsinə baxmayaraq, vergi orqanına təqdim olunmuş bəyannamələrə gəlirlər və xərclər barədə bilərəkdən təhrif olunmuş məlumatlar daxil etməklə, 480.000 AZN məbləğində vergiləri dövlət büdcəsinə ödəməkdən yayınmışdır.

Bundan başqa o, “Texnikabank” Açıq Səhmdar Cəmiyyətinin “İnşaatçılar” filialının baş mühasibi Elçin Asəf oğlu Hüseynov və başqa şəxslərlə qabaqcadan əlbir olaraq, 2004-cü ilin iyun-avqust aylarında həmin müəssisənin adından müxtəlif təşkilatlarla əməliyyatlar apararaq, gəlir əldə etmiş, lakin vergi orqanına təqdim etdiyi bəyannamələrə gəlirlər və xərclər barədə bilərəkdən təhrif olunmuş məlumatlar daxil edib, 580.000 AZN məbləğində vergiləri dövlət büdcəsinə ödəməkdən yayınmış, “Viktoriya-M” və “Aksu” Məhdud Məsuliyyətli Cəmiyyətlərin əlavə dəyər vergisi əvəzləşməsinə hüquq verən rəsmi vergi hesab-fakturalarını saxtalaşdırmışdır.

Bu əməllərə görə Lalə Əsgərovaya qarşı Azərbaycan Respublikası CM-in 213.4-cü, 320.1-ci və 320.2-ci, onun bu cinayətləri törətməsinə kömək etmiş Elçin Hüseynova qarşı isə CM-in 32.5-ci, 213.4-cü və 313-cü maddələri ilə ittiham irəli sürülmüş, hər ikisi barəsində məhkəmənin qərarları ilə həbs qətimkan tədbiri seçilmişdir.

Başqa bir cinayət işi üzrə aparılmış ibtidai istintaqla müəyyən edilmişdir ki, Ruslan Cəlal oğlu Əliyev qeyri-rəsmi qaydada rəhbərlik etdiyi “Buta-A LTD” və “Olimp-N” Məhdud Məsuliyyətli Cəmiyyətlərinin direktoru Ceyhun Abdulla oğlu Mirseyibov ilə qabaqcadan əlbir olub, “Olimp-N” Məhdud Məsuliyyətli Cəmiyyətin 2004-cü ilin fevral-iyun, “Buta-A LTD” Məhdud Məsuliyyətli Cəmiyyətin 2004-cü ilin mart-iyun aylarındakı əməliyyatları üzrə gəlirlər və xərclərinə dair bəyannamələr təqdim etməməklə, “Olimp-N” Məhdud Məsuliyyətli Cəmiyyət üzrə 1.220.000 FƏT, “Buta-A” Məhdud Məsuliyyətli Cəmiyyət üzrə 320.000 AZN məbləğində vergiləri dövlət büdcəsinə ödəməkdən yayınmışdır.

Bu əməllərə görə Ruslan Əliyev və Ceyhun Mirseyibova qarşı Azərbaycan Respublikası CM-in 213.4-cü maddəsi ilə ittiham irəli sürülmüş, sonuncunun barəsində cinayət işi məhkəməyə göndərilmiş, birinci isə istintaqdan qaçıb gizləndiyi üçün onun barəsində həbs qətimkan tədbiri seçilməklə axtarış elan olunmuşdur.

Həmin cinayət işinin istintaqı zamanı məlum olmuşdur ki, “Texnikabank” Açıq Səhmdar Cəmiyyətinin müştəri xidmətləri Departamentində korporativ müştərilərlə iş üzrə şöbə müdiri vəzifəsində işləmiş Elçin Əli oğlu Qasımov bir qrup şəxslə qabaqcadan əlbir olaraq, 2004-cü ilin oktyabr-dekabr aylarında bankın müştərisi “Olimp-N” Məhdud Məsuliyyətli Cəmiyyətin direktoru Ceyhun Abdulla oğlu Mirseyibovun Azərbaycan Respublikası ərazisində olmadığı 2004-cü il oktyabrın 2-dən 2005-ci il fevralın 4-dək olan dövrdə pulun bankdan nağd formada çıxarılmasına dair imzalanmış və möhürlənmiş çek vərəqləri əsasında 3 dəfəyə cəmi 480.000 AZN məbləğində pulun guya sonuncuya verilməsinin sənədləşdirilməsini təşkil etmiş, saxtalaşdırdığı bu rəsmi sənədləri xəzinədar Zümrüd Şıxı qızı Şıxıyevaya imzalatmış, faktiki olaraq isə həmin pulu “Olimp-N” Məhdud Məsuliyyətli Cəmiyyətin rəhbəri Ruslan Cəlal oğlu Əliyevə vermişdir. Bu yolla o, həmçinin Ruslan Əliyevin həmin gəlirlərə müvafiq olan 72.720 AZN əlavə dəyər vergisini dövlət büdcəsinə ödəməkdən yayınmasına kömək etmişdir.

Bu əməllərə görə Elçin Qasımova qarşı Azərbaycan Respublikası CM-in 32.5-ci, 213.4-cü və 313-cü maddələri ilə ittiham irəli sürülmüş və məhkəmənin qərarı ilə onun barəsində həbs qətimkan tədbiri seçilmişdir.

Göstərilən cinayətlər vəzifəli şəxslərin korrupsiya əməlləri ilə müşayiət edildiyindən Azərbaycan Respublikası baş prokurorunun qərarı ilə qeyd edilən cinayətlər üzrə ibtidai istintaqın davam etdirilməsi Baş Prokurorun yanında Korrupsiyaya Qarşı Mübarizə İdarəsinə həvalə edilmişdir.

Azərbaycan Respublikasının Baş Prokurorluğu və Vergilər Nazirliyi vergi qanunvericiliyinə dəqiq riayət olunmasına nəzarətin gücləndirilməsinə, vergi hüquqpozmaları hallarına dair məlumatların toplanıb təhlil edilməsinə, belə halların yaranması səbəblərinin və şəraitin aradan qaldırılmasına, vergi və korrupsiya cinayətlərinin qarşısının alınmasına, cinayətə görə cəzanın labüdlüyü prinsipini təmin etməklə, belə cinayətlərin törədilməsində təqsiri olan şəxslərin məsuliyyətə cəlb olunmalarına, büdcəyə dəyən ziyanın bərpa edilməsinə, vergi ödəyicilərinin hüquqlarının və qanuni mənafelərinin gözlənilməsinə və müdafiə olunmasına istiqamətlənmiş zəruri tədbirləri davam etdirirlər.