SİYASƏT
Sentyabr əməliyyatlarının hərbi-strateji nəticələri - ŞƏRH
![Sentyabr əməliyyatlarının hərbi-strateji nəticələri - ŞƏRH](/files/2023/3/1200x630/16947025602463826131_1200x630.jpg)
Bakı, 14 sentyabr, AZƏRTAC
Ermənistanın ötən ilin sentyabrın 12-14-də Azərbaycanla şərti dövlət sərhədində törətdiyi təxribatlarından bir il ötür. Məhz bundan sonra Nikol Paşinyan 2022-ci ilin oktyabrın 6-da Praqada Azərbaycanın ərazi bütövlüyünü 1991-ci il “Alma-Ata Bəyannaməsi” çərçivəsində, yəni, keçmiş Azərbaycan SSR-in sərhədləri çərçivəsində tanıdığını bildirdi. Daha sonra Ermənistanın baş naziri dəqiqləşdirmə edərək Azərbaycan ərazisini 86,6 kvadratkilometr, yəni, Qarabağ və anklavlar da daxil olmaqla tanıdığını bəyan etdi. Bu tanınma təəssüf ki, Vətən müharibəsindən düz iki il sonra baş verdi. Bu məqamda məntiqi olaraq soruşulmalıdır ki, niyə Ermənistan bu tanınmanı əvvəl xoşluqla etmirdi? Ona qədər Ermənistan rəsmiləri Azərbaycanın ərazi bütövlüyü ilə bağlı ikibaşlı və “sürüşkən” ifadələr işlədərək, dünya ictimaiyyətini də öz fikirləri ilə manipulyasiya edirdilər. Gah Azərbaycanın ərazi bütövlüyünü tanıdıqlarını deyir, gah da Qarabağın buraya aid deyil, başqa məsələ olduğunu göstərirdilər. Ermənistan riyakarcasına bildirirdi ki, keçmiş Azərbaycan SSR-in ərazisində iki dövlət yaranıb. Maraqlıdır ki, Ermənistan bu cür söz oyununa hələ 2004-cü ildə keçmiş prezident Robert Köçəryanın vaxtında, ilk dəfə bu şəxsin Avropa Şurası Parlament Assambleyasında çıxışı ilə başlamışdı.
AZƏRTAC xəbər verir ki, bu sözləri Cənubi Qafqaz Tədqiqatlar Mərkəzinin direktor müavini, politoloq Fuad Çıraqov söyləyib.
Onun sözlərinə görə, ötən ilin sentyabrında Azərbaycan Silahlı Qüvvələrinin uğurlu əməliyyatının nəticələrindən və dərslərindən biri o oldu ki, əgər rəsmi İrəvan iki ölkə arasında şərti sərhədləri tanımayacaqsa, dövlətimiz də qarşılıqlı olaraq Ermənistanın ərazisini tanımayacaq. Bu səbəbdən də Ermənistan Praqada məcbur olub ikibaşlı ifadələrə son qoyaraq dəqiqləşdirmələrə getdi. Ona görə də Rusiya Prezidenti Putin bu günlərdə çıxışında dedi ki, məhz Ermənistan artıq Qarabağı Azərbaycanın ərazisi kimi tanıyıb və yeni reallıq yaranıb, bizlik artıq bir şey qalmayıb. Bunlar keçən il sentyabr əməliyyatının siyasi nəticələri idi.
“2022-ci ilin 12-14 sentyabr əməliyyatlarının iki hərbi-strateji məqamından danışan politoloq vurğulayıb: “Birincisi, Murovdan-Araza qədər bütün strateji yüksəkliklər Azərbaycan Silahlı Qüvvələrinin nəzarətinə keçdi, yəni, Ermənistanın bütün cənubu adi gözlə Ordumuzun tam nəzarətindədir. İkincisi, keçən il üzü qışa Kəlbəcər üçün Ermənistan tərəfindən hazırlanan və gizlədilməyən hərbi təhlükə aradan qalxdı. Belə ki, ötən ilin sentyabrına qədər Ermənistan silahlı qüvvələri Kəlbəcər rayonu ilə şərti sərhəddə böyük canlı qüvvə və hərbi texnika toplamışdı. Erməni hərbi ekspertləri Kəlbəcərin üzü qışa doğru “strateji mühasirədə” və ya “kisədə” olduğunu, oranı istədikləri zaman asanlıqla yenidən işğal edə biləcəkləri xülyasına qapılmışdılar. Azərbaycan Silahlı Qüvvələri preventiv və cəza tədbirləri ilə Ermənistan ərazisində ölkəmizə qarşı yönəlmiş təhlükəni beşiyindəcə zərərsizləşdirdi və onların xülyasını növbəti dəfə boşa çıxardı. Keçən ilin sentyabrından sonra olanlar bir daha göstərdi ki, Ermənistanın xoşluqla sülhə razı olmaq niyyəti yoxdur, onlar ancaq məcburedilmə dilindən anlayırlar. Ona görə də sentyabr əməliyyatlarını regionda sülhə doğru atılan mühüm addım kimi qiymətləndirmək lazımdır”, - deyə F.Çıraqov bildirib.