Sərmayəçi Uorren Baffeti “Photoshop” proqramı vasitəsilə aldadıblar
Bakı, 21 may, AZƏRTAC
Almaniyanın paslanmayan polad istehsalı ilə məşğul olan “Wilhelm Schulz” kompaniyasının sabiq rəhbərliyi böyük dələduzluqda şübhəli bilinir.
AZƏRTAC “Financial Standard” nəşrinə istinadla xəbər verir ki, bir neçə il bundan öncə şirkətin sahibləri “Photoshop” proqramı vasitəsilə maliyyə vəziyyətinə aid saxta sənədlər hazırlayıb. 2017-ci ildə amerikalı sərmayəçi Uorren Baffetin “Berffhire Hathaway Inc” kompaniyası həmin şirkəti 800 milyon avroya satın alıb.
Lakin çox keçmədən Uorren Baffetə şirkətin hesabatının saxta olduğu barədə məlumat çatıb. “Berffhire Hathaway” investisiya kompaniyasının əməkdaşları rəqəmləri müqayisə edərək iflas astanasında dayanan şirkəti aldıqlarını anlayıb. Nyu-York Arbitraj məhkəməsi şirkətin 157 milyon avrodan baha olmadığını və 643 milyon avroluq fərqin ödənilməli olduğu barədə qərar çıxarıb.
Almaniya prokurorluğu hesab edir ki, bu, “Wilhelm Schulz” tərəfindən sərmayəçilərin ilk aldadılması faktı deyil. İstintaqın fikrincə, şirkət indiyədək ən azı 47 kommersiya sövdələşməsi üzrə sifarişləri və hesabları saxtalaşdırıb. “Wilhelm Schulz” kompaniyasının sabiq rəhbərləri isə öz növbəsində ünvanlarına səsləndirilən bütün ittihamları rədd edirlər.
Bölmənin digər xəbərləri
