Şirvanda tədbir: “Heydər Əliyev və Azərbaycan səhiyyəsi”
Şirvan, 28 fevral, Aydın Yavərzadə, AZƏRTAC
Şirvan Diaqnostika Mərkəzində Şirvan Şəhər İcra Hakimiyyətinin və YAP şəhər təşkilatının birgə təşkilatçılığı ilə Ümummilli Lider Heydər Əliyevin anadan olmasının 100 illiyinə həsr olunan “Heydər Əliyev və Azərbaycan səhiyyəsi” adlı tədbir keçirilib.
AZƏRTAC-ın bölgə müxbiri xəbər verir ki, tədbirdə YAP Şirvan şəhər təşkilatının rəhbərliyi, şəhər icra hakimiyyətinin və Şəhər Mərkəzi Xəstəxanası publik hüquqi şəxsin məsul əməkdaşları, səhiyyə işçiləri iştirak ediblər. Əvvəlcə tədbir iştirakçıları Şirvan Diaqnostika Mərkəzinin foyesində Dövlət Rəsm Qalereyasının və şəhər məktəblilərinin əl işlərindən və rəsm əsərlərindən, həmçinin Heydər Əliyev Mərkəzinin eksponatlarından ibarət sərgi ilə tanış olublar. Sonra məktəblilərin ifasında Ulu Öndər Heydər Əliyevə həsr olunmuş ədəbi-bədii kompozisiya nümayiş etdirilib.
Tədbir Şirvan Diaqnostika Mərkəzinin akt zalında davam edib. Ümummilli Lider Heydər Əliyevin və görkəmli ictimai xadim, oftalmoloq-alim Zərifə xanım Əliyevanın, şəhidlərin və qardaş Türkiyədə zəlzələ nəticəsində həlak olanların xatirəsi bir dəqiqəlik sükutla yad edilib.
Çıxış edənlər Ulu Öndər Heydər Əliyevin Azərbaycan səhiyyəsinin inkişafına göstərdiyi xidmətlərdən söz açıblar. Hələ ötən əsrin 70-80-ci illərində tibb üzrə xarici mütəxəssislərin diqqətini Azərbaycana cəlb etməsindən, tibb elmi və səhiyyə sahəsində mövcud durğunluğun aradan qaldırılmasına nail olmasından bəhs edilib.
Bildirilib ki, Ümummilli Lider Heydər Əliyev səhiyyə quruculuğu ilə əlaqədar tədbirlər kompleksinə - köhnə səhiyyə ocaqlarının yenidən qurulması, yenilərinin tikilməsi və ən müasir aparatlarla təchiz edilməsi, əhalinin kütləvi dispanser qeydiyyatından keçirilməsi və sahə həkimlərinin fəaliyyətinin artırılmasından başladı. Ulu Öndər hər zaman tibb işçilərinə böyük qayğı göstərmiş və çıxışlarında həkimlik peşəsinin öz xalqına, sənətinə yüksək sədaqət tələb edən bir iş olduğunu vurğulayırdı. Məhz onun ölkəyə rəhbərliyi dövründə müasir səhiyyə ocaqlarının istifadəyə verilməsinə başlandı. Nəinki paytaxt Bakıda, ən ucqar regionlarda, kəndlərdə belə ən müasir tibbi mərkəzlər yaradıldı ki, bu mərkəzlərdə tibb işçilərinin fəaliyyəti üçün geniş imkanlar vardı.
Qeyd olunub ki, Ulu Öndər Heydər Əliyevin siyasi varisi, Azərbaycan Respublikasının Prezidenti İlham Əliyev də bu sahəyə xüsusi qayğı ilə yanaşır. Çıxışlarda Azərbaycan səhiyyəsinin inkişafından, milli kadr potensialının gücləndirilməsindən, müasir avadanlıqlarla təchiz edilmiş tibb müəssisələrinin inşasından da söz açılıb. Dünyanı bürüyən koronavirus infeksiyasına qarşı mübarizədə səhiyyə işçilərinin əvəzsiz xidmətləri xüsusi vurğulanıb.
Sonra Ümummilli Lider Heydər Əliyevin həyat və fəaliyyətindən bəhs edən film nümayiş olunub.
Bölmənin digər xəbərləri
