Slovakiyalı jurnalistin qətlində ittiham olunan milyonçuya bəraət verilib
Bratislava, 3 sentyabr, AZƏRTAC
Tədqiqatçı jurnalist Yan Kutsiak və nişanlısı Martina Kuşnirovanın qətli ilə bağlı məhkəmə prosesi başa çatıb. Sentyabrın 3-də məhkəmə ikiqat qətl hadisəsi ilə bağlı sensasiyalı hökm verib.
AZƏRTAC xəbər verir ki, məhkəmə jurnalistin qətlini sifariş verməkdə ittiham olunan milyonçu Marian Koçnerə bəraət verib. Məhkəmənin qərarında ittihamın sübuta yetirilməsi üçün kifayət qədər dəlillərin olmadığı göstərilib. Məhkəmə M.Koçneri qeyri-qanuni silah saxlama maddəsi ilə beş min avro məbləğində cərimələyib.
Bununla da 2018-ci il fevralın 21-də qətlə yetirilən və ölümü ilə Slovakiyanın ictimai-siyasi həyatında zəlzələ effekti yaradan Yan Kutsiakın məsələsi növbəti mərhələyə qədəm qoyub. Məhkəmənin qərarını şərh edən mətbuat nümayəndələri vətəndaşların bu qərarla razılaşmayacaqlarını və ölkədə yenidən etiraz dalğalarının baş verəcəyini proqnozlaşdırırlar. Eyni zamanda, dövlət ittihamçısının məhkəmənin qərarından yuxarı instansiya məhkəməsinə protest verəcəyi gözlənilir.
Qeyd edək ki, jurnalisti qətlə yetirən keçmiş hərbçi Miroslav Marçekə artıq 23 il həbs cəzası verilib. Onu hadisə yerinə aparan sürücü Tomaş Szabo isə sentyabrın 3-də keçirilən məhkəmədə 25 il müddətinə azadlıqdan məhrum edilib.
Elgün Niftəli
AZƏRTAC-ın xüsusi müxbiri
Bratislava
Bölmənin digər xəbərləri
