“SpaceX” şirkəti “Sentinel-6B” peykini orbitə çıxarıb
Bakı, 17 noyabr, AZƏRTAC
“SpaceX” şirkətinin “Falcon 9” daşıyıcı raketi Avropa Kosmik Agentliyinin qlobal dəniz səviyyəsini izləmək üçün nəzərdə tutulan “Sentinel-6B” peykini orbitə çıxarıb.
AZƏRTAC xəbər verir ki, daşıyıcı raket noyabrın 16-da Sakit okean vaxtı ilə saat 22:21-də ABŞ Hərbi Hava Qüvvələrinin Kaliforniyada yerləşən “Vandenberq” bazasından fəzaya buraxılıb. Təxminən bir saat sonra peyk daşıyıcı raketin ikinci pilləsindən ayrılaraq orbitə daxil olub.
NASA-nın hazırladığı “Sentinel-6B” peyki qlobal dəniz səviyyələrini dəqiq müəyyən etmək və okean üzərində rütubəti, təzyiqi və temperaturu ölçmək üçün nəzərdə tutulub. Məlumatlar təbii fəlakətləri daha yaxşı proqnozlaşdırmağa və iqlim dəyişikliyi modellərini yaratmağa yardım edəcək.
Qeyd edək ki, “Sentinel-6B” ətraf mühitin monitorinqini aparan Avropanın “Copernicus” orbital qruplaşmasına daxildir. O, 2030-cu ilədək orbitdə qalacaq.
Bölmənin digər xəbərləri
