STEAM dərsləri şagirdlərin yaradıcı və tənqidi düşüncəsində mühüm rol oynayır MÜSAHİBƏ
Bakı, 29 aprel, AZƏRTAC
Müasir təhsil prosesində innovativ metodların tətbiqi prioritet istiqamətlərdəndir. STEAM modeli şagirdlərin fənlərarası biliklərinin möhkəmlənməsi və yaradıcı düşüncə bacarıqlarının formalaşmasında mühüm rol oynayır. Bu istiqamətdə görülən işlərlə bağlı 20 nömrəli məktəb-liseyin STEAM tədrisi üzrə rəhbəri Çinarə Kazımova AZƏRTAC-a müsahibəsində məktəbdə həyata keçirilən tədbirlər barədə məlumat verib. Müsahibəni təqdim edirik.
-Çinarə xanım, STEAM təhsil modelinin məktəbinizdə tətbiqində əsas məqsəd nədir?
- Əvvəlcə onu qeyd etmək istərdim ki, STEAM sözü - science (elm), technology (texnologiya), engineering (mühəndislik), art (incəsənət), mathematics (riyaziyyat) sahələrini birləşdirməklə təhsilə innovativ yanaşmadır. Bu yanaşma şagirdlərin kreativ düşünmə, problem həlletmə, əməkdaşlıq və praktik bacarıqlarını inkişaf etdirməyə yönələn bir fəaliyyətdir. STEAM layihəsinin məqsədi şagirdlərin fənlərarası əlaqəsini gücləndirmək, onların real həyatda qarşılaşdıqları problemləri araşdıraraq öyrənmələrini təmin etmək, yaradıcı və tənqidi düşünmələrinə şərait yaratmaqdır. XI əsrin bacarıqlarını 4K (kreativlik, əməkdaşlıq, ünsiyyət, tənqidi düşüncə) kimi inkişaf etdirməkdə və şagirdlərin müasir texnologiyaların tədrisə inteqrasiyasını təşkil etməkdə kömək edir.
- Şagirdlərin STEAM sahəsində marağını necə müşahidə edirsiniz?
- Şagirdlər bu dərslərə gəldikləri zaman həvəslə çalışırlar və real həyatda qarşılaşdıqları problemləri həll edə bilirlər. Bununla yanaşı, şagirdlərə sualların cavabı avtomatik deyilmir, onlar suallara cavabı araşdıraraq öyrənirlər. İnternet, kitablar və yaxud digər məlumat mənbələrindən tez-tez istifadə edirlər. İlk olaraq şagirdlərin bu sahələrdə nəzəri bilikləri artırılır, daha sonra isə onlar praktikada bu bilikləri tətbiq edirlər.
- STEAM təhsilini daha geniş miqyasda tətbiq etmək üçün hansı planlarınız var?
- Bu sahəyə şagirdlərin marağını daha da cəlb etmək, onlara proqramlaşdırmanın incəliklərini öyrətmək üçün onları düzgün istiqamətləndiririk. Bu tədbirlərin indidən həyata keçirilməsi şagirdlərin gələcəkdə tələbə həyatına addım atdıqları zaman bünövrə rolunu oynayacaq. Şagirdlərimiz bu sahədə əsas bilik bazasını məktəbdən əldə etsələr, Azərbaycanı digər ölkələrdə də uğurla təmsil edə bilərlər. Bu addım məktəbimizin şagirdlərinin gələcəyi üçün mühüm bir şansdır.
- Bu modelin tətbiqi nəticəsində müşahidə etdiyiniz əsas dəyişikliklər nələrdir?
- Burada əsas dəyişikliklər ondan ibarətdir ki, fənlərarası əlaqə daha da möhkəmlənib. Şagirdlərin istər coğrafiya, istərsə də riyaziyyat sahəsində öyrəndiklər bilikləri bir daha STEAM dərslərində keçdiyimiz zaman fənlərarası əlaqə yaramış oluruq və bu şagirdlərin daha çox marağına səbəb olur. Bu faktorlar öz növbəsində şagirdlərin yaradıcı və tənqidi düşüncəsində mühüm rol oynayır.
- Bu sahədə tətbiq olunan fəaliyyətlər hansılardır?
- STEAM layihəsində tətbiq olunan fəaliyyətlərə nəzər salsaq, onu deyə bilərəm ki, bu fəaliyyətlərə robototexnika və proqramlaşdırma, maket quruculuğu, 3D modelləşdirməsi, təbiət hadisələrinin təcrübə yolu ilə izahı və rəqəmsal incəsənət və qrafik dizayn, ekoloji və sosial mövzuda olan tədqiqat layihələri aiddir və bu da öz növbəsində şagirdlərimizə əməkdaşlıq çərçivəsində problemi həlletmə üsullarını öyrədir.
Bölmənin digər xəbərləri
