Stiven Siqal Timur Bekmambetovla birlikdə Çingiz xan haqqında film çəkmək niyyətindədir
Bakı, 2 iyul (AZƏRTAC). Hollivud aktyoru Stiven Siqal Çingiz xan haqqında film çəkmək niyyətindədir.
Qazaxıstanın paytaxtında keçirilən “Astana - 2011” II Beynəlxalq ekşn-filmlər festivalında iştirak edən aktyor iyulun 2-də mətbuat konfransında bildirmişdir ki, böyük xaqanın obrazını şəxsən özü canlandırmaq niyyətindədir.
S.Siqal demişdir: “Çingiz xan haqqında film çəkmək istəyirəm. Çoxlu təkliflər alıram, lakin mən sadəcə film deyil, böyük epos ekranlaşdırmaq niyyətindəyəm. Bu işdə mənə dostum - Astana meri İmanqali Tasmaqanbetov kömək edəcəkdir”.
Siqal etiraf etmişdir ki, böhranla əlaqədar Amerikada kino sənayesi ağır günlər yaşayır. Ona görə də Çingiz xan haqqında filmi rusiyalı və qazaxıstanlı kinematoqrafçılarla birlikdə çəkmək niyyətindədir.
Aktyor demişdir: “Hazırda Rusiya rejissorları ilə birgə layihələr üzərində çalışırıq. Özü də təkcə süjet üzərində işləmirik, həm də maliyyə məsələlərini yoluna qoyuruq. Timur Bekmambetovla müştərək işə çox ümid bəsləyirəm. Onu işinin vurğunu olan böyük rejissor sayıram”.
Bölmənin digər xəbərləri
