Cənubi Sudanda hərbi bazaya hücum nəticəsində 20 nəfər ölüb
Qahirə, 5 sentyabr, AZƏRTAC
Cənubi Sudanın Varap ştatında hərbi bazaya silahlı hücum nəticəsində 20 nəfər həlak olub.
AZƏRTAC yerli mediaya istinadla xəbər verir ki, ölənlərin 16-sı hərbçi və polis əməkdaşı, 4-ü isə mülki şəxsdir. Hücum edənlərdən 6 nəfərin də öldürüldüyü bildirilir.
Varap ştatında yerli qruplar arasında tez-tez qarşıdurmalar baş verir. Toqquşmalar əsasən qisas zəminində və otlaq sahələri uğrunda olur. Avqust ayında da bölgədə oxşar hadisələr baş verib. Lakin son hücumun səbəbi məlum deyil.
Bundan başqa, cümə günü Varap ştatında “misli görünməmiş” quraqlıq səbəbindən fövqəladə vəziyyət elan edilib.
Regional informasiya naziri bildirib ki, yağıntıların azalması əkin sahələrinə, mal-qaraya və otlaqlara ciddi ziyan vurub. Şərqi Afrikanın bəzi ərazilərində “El-Ninyo” iqlim hadisəsi səbəbindən qarşıdakı həftələrdə təbii fəlakət riskinin artacağı bildirilir.
Qeyd olunmalıdır ki, Cənubi Sudan beynəlxalq yardımların azalması fonunda ciddi humanitar problemlərlə üzləşir.
Bölmənin digər xəbərləri
