Memar: Şuşanın hər bir daşı milli kimliyimizin və tariximizin şahididir
Bakı, 5 sentyabr, AZƏRTAC
Azərbaycanın mədəniyyət paytaxtı Şuşanın hər bir daşı, küçəsi və tikilisi milli kimliyimizin və tariximizin şahididir. Bu baxımdan şəhərin təbii və tarixi səthlərinə müxtəlif yazıların həkk olunması yolverilməzdir.
Bu fikirləri AZƏRTAC-a açıqlamasında memar Abdul Hüseynov deyib. O bildirib ki, belə hərəkətlər təkcə şəhərin görünüşünə xələl gətirmir, eyni zamanda, əsrlər boyu qorunub saxlanılan tarixi yaddaşa zərər vurur.
“Tarixi və mədəni irsin qorunması həm dövlətin, həm də hər bir vətəndaşın borcudur. Bu məsələ Şuşa üçün xüsusilə böyük əhəmiyyət daşıyır. Çünki Şuşa təkcə zəngin tarixi və memarlıq irsinə malik şəhər deyil, həm də Azərbaycanın ərazi bütövlüyü uğrunda şəhid olan qəhrəmanlarımızın qanı ilə azadlığına qovuşmuş müqəddəs məkandır. Şuşanın hər bir daşı, qayası və küçəsi tariximizin bir parçasıdır. Bu səbəbdən burada hər hansı səthə ad, tarix və ya digər yazı yazmaq, onu cızmaq təkcə şəhərin görünüşünə xələl gətirmək deyil, həm də bu torpağın daşıdığı mənəvi və tarixi dəyərə hörmətsizlikdir. Son dövrlərdə Bakıda baş verən analoji hallar, o cümlədən bu ilin aprelində ölkə əhəmiyyətli memarlıq abidəsi olan Nizami Kino Mərkəzinin fasadına müxtəlif yazıların və qraffitilərin çəkilməsi göstərir ki, məsələyə yalnız ayrı-ayrı şəxslərin hərəkəti kimi yanaşmaq olmaz. Bu, ümumilikdə ictimai məsuliyyət və şəhər mədəniyyəti məsələsidir. Nizami Kino Mərkəzində baş verən hadisə vandalizm aktı kimi qiymətləndirilib və əməli törədən şəxslərlə bağlı hüquqi tədbirlər görülüb. Eyni yanaşmanı Şuşaya da tətbiq etməliyik. Belə halların qarşısının alınması üçün ictimai nəzarət gücləndirilməli, mühafizə və kamera nəzarəti mexanizmləri təkmilləşdirilməli, qanunvericilikdə nəzərdə tutulan məsuliyyət tədbirlərinin tətbiqi təmin olunmalıdır. Eyni zamanda, Şuşaya səfər edən turistlər və ziyarətçilər şəhərin tarixi və mənəvi əhəmiyyəti barədə əvvəlcədən maarifləndirilməlidirlər. Şuşaya gələn hər bir insan bilməlidir ki, bura sadəcə turistlərin gəzdiyi məkan deyil. Şuşa Azərbaycanın mədəniyyət paytaxtı, milli kimliyimizin simvollarından biri və şəhidlərimizin qanı ilə azad edilmiş müqəddəs şəhərdir. Buradakı hər bir daşın qorunması tariximizin qorunması deməkdir və buna görə də hər bir şəxs Şuşanın təbii və tarixi mühitinə münasibətdə maksimum həssaslıq və məsuliyyət nümayiş etdirməlidir”, – deyə memar qeyd edib.
Abdul Hüseynov bildirib ki, tarixi və mədəni irsin qorunması həm dövlətin, həm də hər bir vətəndaşın borcudur. Bu məsələdə yalnız tənqidlə kifayətlənmək olmaz. Şuşaya səfər edən hər bir şəxs şəhərə sadəcə istirahət məkanı kimi deyil, Azərbaycanın milli simvolu və müqəddəs ziyarətgahı kimi yanaşmalıdır. Turistlərin davranış qaydaları barədə maarifləndirilməsi gücləndirilməli, turizm şirkətləri və bələdçilər tərəfindən bu istiqamətdə mütəmadi məlumatlandırma aparılmalıdır.
Müxbir – Nərmin Muradzadə
Bölmənin digər xəbərləri
