SUDANDA QƏZET REDAKTORU OĞURLANARAQ ÖLDÜRÜLMÜŞDÜR
Jurnalistin qohumları polisə bildirmişlər ki, maska geymiş silahlı adamlar Təhanı maşına basıb paytaxt Xartumun mərkəzinə tərəf aparmışlar.
Beynəlxalq Jurnalistləri Müdafiə Komitəsinin məlumatına görə, polislər jurnalistin başı bədənindən ayrılmış cəsədini paytaxtın kənarında tapmışlar. Onun qolları bağlı idi.
Bəs, Təhanın belə qəddarlıqla öldürülməsinə səbəb nədir?
Məsələ bundadır ki, keçən il o, öz qəzetində Məhəmməd Peyğəmbərin mənşəyi haqqında məqalə vermiş və bu, sudanlı islamçıları bərk qəzəbləndirmişdir. Bununla əlaqədar təhqiqat aparılmış və onun nəticələrinə əsasən 2005-ci ilin mayında “Əl-Vifaq” qəzetinin çapı üç ay müddətinə dayandırılmış, baş redaktoru isə bir neçə gün həbsxanada qalmışdır. O, siyasi müxalifətin və Darfur əyalətindəki silahlı qrupların ünvanlarına da tənqidi məqalələrlə çıxış edirdi.
Röyterin məlumatına görə, jurnalist hələ həbsdə ikən hakimiyyət orqanları onun həyatı sarıdan narahat olduqlarını bildirmiş və hökumət agentlərinə Təhanın təhlükəsizliyini təmin etməyi tapşırmışdılar.
50 yaşlı Məhəmməd Təhanın öldürülməsinə görə məsuliyyəti Sudanda fəaliyyət göstərən qruplaşmalardan heç biri öz üzərinə götürməmişdir.
Bölmənin digər xəbərləri
