REGİONLAR
Sumqayıt teatrı fəaliyyətini onlayn davam etdirir
![](/files/galleryphoto/2020/1/1200x630/15873945444122940649_1200x630.jpg)
![](/files/galleryphoto/2020/1/1200x630/15873945443436149181_1200x630.jpg)
![](/files/galleryphoto/2020/1/1200x630/1587394544407543261_1200x630.jpg)
Sumqayıt, 20 aprel, Ətrabə Rzayeva, AZƏRTAC
Sumqayıt Dövlət Dram Teatrında xüsusi rejimli karantin günləri zamanı kollektivin fəaliyyətinə həsr olunmuş videokonfrans keçirilib. Teatr əməkdaşlarının fəaliyyətinin ev şəraitinə uyğun tənzimləməsi və digər mühüm məsələlər videokonfransın əsas mövzusu olub.
Teatrdan AZƏRTAC-a bildirilib ki, sahə və xidmət rəhbərlərinin qatıldığı onlayn formatda reallaşan iclasda dünyanı cənginə almış koronavirus pandemiyası (COVID-19) təhlükəsinə qarşı Azərbaycan dövlətinin operativ şəkildə qabaqlayıcı tədbirlər görməsi, sosial izolyasiya çərçivəsində “Evdə qal, sağlam ol” kampaniyasının uğurla aparılması diqqətə çatdırıldı.
Teatrın direktoru, Əməkdar artist Mübariz Həmidov sənət ocaqlarının onlayn fəaliyyətinin müsbət rezonans doğurduğunu söyləyib. Bildirilib ki, müasir texnoloji vasitələrin yaratdığı geniş imkanlardan bəhrələnərək Sumqayıt teatrı da özünün virtual repertuar planını qurub və sosial şəbəkələr üzərindən doğma tamaşaçılarına xidmət göstərir. Karantin günlərinin ilk iki həftəsində tamaşalarının izlənmə sayı 10 tamaşa üçün 7258 olub.
Bu çətin günlərdə mətbuat xidmətinin operativliyinin vacibliyindən danışan direktor videokonfransda iştirak edən rejissorlara aktyorların fəallığının vacibliyini, yaradıcı şəkildə maarifləndirmə işlərinin görülməsini təmin etməklə, birgə işin zəruriliyini tövsiyə edib. Repertuara daxil edilən monotamaşaların məşqlərinin davam etdirilməsini tapşıran rəhbərlik digər vacib məsələlərə də toxunub.
Diqqətə çatdırılıb ki, teatrın inzibati binasında vaxtaşırı dezinfeksiya işləri aparılır. Xüsusi icazəsi olan əməkdaşlardan tələb olunur ki, ehtiyac yaranmadıqda iş yerinə gəlməsinlər. Həmçinin yaşı 65-i keçmiş əməkdaşlarla vaxtaşırı əlaqə saxlasınlar.
Çıxışlarda Nazirlər Kabineti yanında Operativ Qərargahın qərar və tövsiyələrinə əməl etməyin, məşqləri ev şəraitində onlayn davam etdirməyin zəruriliyi vurğulanıb.
Mübariz Həmidov bildirib ki, Prezident İlham Əliyev və birinci xanım Mehriban Əliyeva bu çətin günlərdə daim xalqın yanındadırlar və koronavirusun geniş yayılmasının qarşısının alınması, onun zərərlərinin minimuma endirilməsi üçün lazımi tədbirləri görürlər. Bu günlərdə bir daha sübut edildi ki, Azərbaycan sosial dövlətdir və Prezident hər bir vətəndaşın sosial müdafiəsinin gücləndirilməsinə xüsusi qayğı ilə yanaşır.
Sonda teatrın direktoru yaradıcı heyətə boş vaxtlardan səmərəli istifadə etməyi, repertuar siyasətinin bundan sonra da düzgün formalaşması üçün yeni ideyalar üzərində düşünməyi və işi onlayn məşqlərlə ev şəraitində qurmağı tövsiyə edib.