“Sumqayıt Tikinti Xidmət” ASC investisiya müsabiqəsi vasitəsilə özəlləşdirilib
Bakı, 1 fevral, AZƏRTAC
Əmlak Məsələləri Dövlət Xidməti tam gücü ilə fəaliyyət göstərməyən və ya ümumiyyətlə fəaliyyətini dayandırmış dövlət müəssisələrinin iqtisadi dövriyyəyə qaytarılması və inkişafı istiqamətində işləri davam etdirir. Belə ki, uzun müddət fəaliyyətini dayandırmış “Sumqayıt Tikinti Xidmət” ASC “Azərbaycan Respublikasında dövlət əmlakının özəlləşdirilməsinin II Dövlət Proqramı”na uyğun olaraq, investisiya müsabiqəsi vasitəsilə özəlləşdirilib.
Xidmətdən AZƏRTAC-a bildirilib ki, 2021-ci il dekabrın 2-də Sumqayıt şəhəri, Kimyaçılar küçəsi, 55A ünvanında yerləşən “Sumqayıt Tikinti Xidmət” ASC-nin nizamnamə kapitalının 99,91 faizini təşkil edən 129 min 799 səhminin satışı üzrə investisiya müsabiqəsi elan olunub. 2022-ci il yanvarın 12-də müsabiqə komissiyasının iclası keçirilib və müsabiqə iştirakçılarının təqdim etdikləri təkliflərə baxıldıqdan sonra komissiya tərəfindən açıq səsvermə yolu ilə “EVSAN” MMC investisiya müsabiqəsinin qalibi elan edilib.
Müsabiqənin qalibi ilə yanvarın 26-da imzalanmış alqı-satqı müqaviləsinin şərtlərinə əsasən, investor dövlət büdcəsinə 1 milyon manat məbləğində pul vəsaitinin köçürülməsini, ümumi həcmi 1 milyon 510 min manat təşkil edən İnvestisiya Proqramının icrasını, müəssisənin dövlət büdcəsinə olan borclarının ödənilməsini, habelə digər sosial-iqtisadi öhdəliklərin yerinə yetirilməsini üzərinə götürüb.
İnvestisiya Proqramına görə, dəmir-beton zavodunun qurulması, tikintidə istifadə olunan dəmir-beton dirək, müxtəlif təyinatlı tirlər, su novları, döşəmə panelləri, fasad və hasar divarları kimi məmulatların istehsalının təşkili planlaşdırılır. Layihə çərçivəsində investor tərəfindən beton qarışdırıcı, montaj texnikasının, iri tonnajlı körpülü kran, dəzgah və avadanlıqların alınması nəzərdə tutulur. İnvestor tərəfindən İnvestisiya Proqramının bir il ərzində icrası, 30-dan az olmamaqla yeni iş yerlərinin yaradılması planlaşdırılır. Müəssisənin yenidən qurulması və fəaliyyəti tikinti məmulatlarının istehsalına şərait yaratmaqla yanaşı, bu məhsullara olan tələbatın ödənilməsinə töhfə verəcək.
Bölmənin digər xəbərləri
