SUMQAYITDA YENİ REABİLİTASİYA MƏRKƏZİ İSTİFADƏYƏ VERİLMİŞDİR
Sumqayıtda 20 çarpayılıq stasionarı olan yeni reabilitasiya mərkəzinin açılışı olmuşdur. Əmək və Əhalinin Sosial Müdafiəsi Nazirliyi belə mərkəzləri Bakıda, Gəncədə, Əli Bayramlıda, Naxçıvanda inşa etdirmişdir. Daha bir mərkəzin Şəkidə tikilməsi nəzərdə tutulur.
AZƏRTAC-ın müxbiri xəbər verir ki, regionların sosial-iqtisadi inkişafı Dövlət proqramına əsasən tikilən mərkəzin smeta dəyəri 1 milyard 450 milyon manatdır. Əmək və əhalinin sosial müdafiəsi naziri Əli Nağıyev açılış mərasimində çıxış edərək, əlillərə və əhalinin aztəminatlı təbəqəsinə göstərilən dövlət qayğısına dair konkret misallar çəkdi. O cümlədən, bildirdi ki, hər il 1,2 milyon pensiyaçının pensiyası artırılır. 1997-ci ildən başlayaraq, əlillər və şəhid ailələri üçün yaşayış binaları istifadəyə verilir. Əhalinin kateqoriyasından olan 850 nəfər mənzil almış, 1300 nəfər ixtisaslaşdırılmış avtomobillərlə təmin edilmişdir.
Sumqayıtda reabilitasiya mərkəzi il ərzində 500-600 nəfərə fiziki sağlamlığını bərpa etməyə imkan verəcəkdir. Bununla yanaşı, 30 nəfərin işlə təmin olunması üçün şərait yaradılır. Mərkəz üçün müasir avadanlığı BMT-nin İnkişaf Proqramı Azərbaycan hökumətinə təmənnasız vermişdir.
Sumqayıt Şəhər İcra Hakimiyyətinin başçısı Vaqif Əliyev mərasim iştirakçılarını mühüm sosial obyektin açılışı münasibətilə təbrik edərək vurğuladı ki, əhalinin sosial cəhətdən aztəminatlı təbəqəsinə qayğı ümummilli liderimiz Heydər Əliyevin daxili siyasətinin öncül istiqaməti idi. Ötən il Sumqayıtda şəhid ailələri və Qarabağ müharibəsi əlilləri üçün iki yaşayış binasının istifadəyə verilməsi, bu il beşmərtəbəli yaşayış binasının tikintisinin başa çatdırılması və daha iki belə obyektin nəzərdə tutulması Azərbaycan Prezidenti İlham Əliyevin bu siyasəti uğurla davam etdirməsinə parlaq misaldır.
Milli Məclisin sosial siyasət daimi komissiyasının sədri Hadi Rəcəbli, BMT-nin Azərbaycandakı əlaqələndiricisinin nümayəndəsi Gülşən Rzayeva, ictimai birliklərin rəhbərləri çıxışlarında fiziki sağlamlıqlarını itirmiş insanlara, habelə Vətənimizin müstəqilliyi, suverenliyi və ərazi bütövlüyü naminə canlarından keçmiş şəhidlərin ailələrinə göstərilən daimi qayğıya görə dövlətə minnətdarlıqlarını bildirdilər.
Sonra qonaqlar mərkəzin tibb kabinetləri, palataları, yeməkxanası, idman salonu və s. ilə tanış oldular. Mərkəzin ərazisində istirahət və gəzinti üçün də lazımi şərait yaradılmışdır.
Sonda respublika Veteranlar Şurasının sədri B.Rüstəmovun, respublika Qarabağ Müharibəsi Əlilləri, Veteranları və Şəhid Ailələri İctimai Birliyinin sədri M.Mehdiyevin, Respublika Çernobıl Əlilləri Cəmiyyətinin sədri M.Həsənovun Azərbaycan Prezidenti İlham Əliyevə ünvanlanmış müraciəti oxundu.
Müraciətdə deyilir:
“Möhtərəm Prezident! Azərbaycan Respublikası son bir il ərzində özünün sosial-iqtisadi inkişaf göstəricilərinə görə nəzərəçarpacaq irəliləyişlərə nail olmuşdur. Respublika həyatının bütün sahələrinin canlanmasına, regionlarda yeni müəssisələrin açılmasına, əhalinin məşğulluğunun artırılmasına, qeyri-neft sektorunun xüsusi çəkisinin yüksəldilməsinə, sahibkarlıq fəaliyyətinin stimullaşdırılmasına nail olunmuş, əmək haqlarının, işsizlik müavinətinin, təqaüdlərin, pensiyaların, elmi dərəcələrə görə əlavələrin qaldırılmasına dair sərəncamlar imzalanmışdır. Bütün bu nailiyyətlər təkcə bir ilin uğurları deyil, ümummilli liderimiz Heydər Əliyev tərəfindən əsası qoyulan sosial-iqtisadi siyasətin məntiqi nəticəsi, məhz Sizin tərəfinizdən layiqincə davam etdirilən böyük inkişaf yolunun uğurlu göstəriciləridir”.
Sonra müraciətdə deyilir ki, bu gün qarşıda duran ən vacib problemlərdən biri də xüsusi qayğıya və yardıma ehtiyacı olan əlil vətəndaşlarımızın cəmiyyətə fəal inteqrasiyasının təmin edilməsidir. Ölkəmizdə bu istiqamətdə də mühüm tədbirlər görülmüşdür. Gəncə və Əli Bayramlıda müasir avadanlıqla təchiz edilmiş reabilitasiya mərkəzlərinin, Şağanda beynəlxalq standartlara uyğun pansionatın tikilib istifadəyə verilməsi, Bakıda Uşaq Bərpa Mərkəzinin, Protez-Ortopedik Bərpa Mərkəzində 60 çarpayılıq cərrahiyyə şöbəsinin və Naxçıvanda Əlilləri Reabilitasiya Mərkəzinin açılması dövlətimizin başçısının bu sahəyə xüsusi önəm verdiyinin parlaq təzahürüdür.
Müraciətdə daha sonra deyilir: “Bu gün Sumqayıtda da müasir tibbi və məişət avadanlığı ilə təchiz edilmiş Əlilləri Reabilitasiya Mərkəzinin tikilib istifadəyə verilməsi regionların sosial-iqtisadi inkişafı Dövlət Proqramından irəli gələn vəzifələrin yerinə yetirilməsinə əyani sübutdur.
Sevindirici haldır ki, reabilitasiya imkanlarının genişləndirilməsi nəticəsində ötən illərdə müalicəsi yalnız xaricdə mümkün olan əlillərimizin çoxunun artıq ölkənin özündə şəfa tapmasına şərait yaradılmış, əlilliyin ağırlaşmasının dinamikası zəifləmiş, tam və hissəvi reabilitasiya göstəriciləri yaxşılaşmışdır”.
Müraciət bu fikirlərlə bitir: “Zati-aliləri! Əldə olunan nailiyyətlər Sizin rəhbərliyiniz ilə həyata keçirilən səmərəli və məqsədyönlü sosial müdafiə tədbirlərinin ilbəil daha geniş vüsətlə davam etdiriləcəyinə bir daha əminlik yaradır. Müstəqil Azərbaycan öz böyük gələcəyinə doğru inamla addımlayır və qədəm qoyduğumuz hər təzə ildə ölkəmizin qarşısında inkişaf və tərəqqinin yeni üfüqləri açılır. Bir daha Sizə dərin minnətdarlığımızı bildirir, dövlətimizin iqtisadi və siyasi qüdrətinin artırılması, xalqımızın layiq olduğu xoşbəxt və firavan həyata qovuşması üçün gördüyünüz işlərdə müvəffəqiyyətlər diləyirik. Bu missiyanızın həyata keçirilməsində daim Sizə yardımçı olacağımıza əmin ola bilərsiniz”.
Bölmənin digər xəbərləri
