CƏMİYYƏT
Suraxanıda son bir ayda keçirilmiş əməliyyatlar zamanı 109 nəfər saxlanılıb VİDEO
![Suraxanıda son bir ayda keçirilmiş əməliyyatlar zamanı 109 nəfər saxlanılıb VİDEO](/files/2022/2/1200x630/16525267173525856271_1200x630.jpg)
Bakı, 14 may, AZƏRTAC
Suraxanı Rayon Polis İdarəsinin əməkdaşları tərəfindən son bir ayda keçirilən əməliyyatlar zamanı narkotiklərin qanunsuz dövriyyəsi ilə məşğul olan ümumilikdə 95 nəfər saxlanılıb.
Daxili İşlər Nazirliyinin mətbuat xidmətindən AZƏRTAC-a bildirilib ki, aşkarlanan bütün faktlarla əlaqədar idarənin istintaq şöbəsində cinayət işləri başlanılıb. Saxlanılan şəxslərdən 80-i barəsində məhkəmə tərəfindən həbs, 15-i haqqında isə polisin nəzarəti altına vermə qətimkan tədbiri seçilib. Onlardan ümumilikdə 21 kiloqram narkotik vasitə və psixotrop maddə aşkarlanıb. Saxlanılardan 11-i birbaşa olaraq Suraxanı və paytaxtın digər ərazilərində narkotik maddələrin satışına nəzarət edən şəxslər olublar.
Qeyd edilən dövrdə Suraxanı Rayon Polis İdarəsinin əməkdaşlarının keçirdikləri əməliyyatlar zamanı Hövsan, Qaraçuxur, Əmircan və Yeni Günəşli qəsəbələrindəki evlərdən, mağazalardan, ödəmə terminallarından, kitabxanalarda silsilə oğurluqlar edən, habelə binalarda liftlərin əyləc dolaqlarını qarət edən doqquz cinayətkar qrupun 14 nəfərdən ibarət üzvü saxlanılıb. Bu şəxslərin həmin ərazilərdə yerləşən 36 ev və obyektdən pul, qızıl-zinət, məişət və digər əşyalar oğurladıqları müəyyənləşdirilib.
Qeyd olunan faktların hər biri ilə bağlı Suraxanı Rayon Polis İdarəsində araşdırmalar davam etdirilir.