“Şuşa-Qarabağın dünəni, bu günü, sabahı” adlı layihə davam edir
Bakı, 2 noyabr, AZƏRTAC
“Şuşa İli” ilə əlaqədar Azərbaycan İstiqlal Muzeyi tərəfindən həyata keçirilən “Şuşa-Qarabağın dünəni, bu günü, sabahı” adlı layihə çərçivəsində müxtəlif mövzular üzrə təqdimatlar davam edir.
Muzeydən AZƏRTAC-a bildirilib ki, növbəti təqdimat mədəniyyət paytaxtımız Şuşanın qədim bayramlarından biri olan Novruz bayramına həsr olunub.
Novruz günəş təqviminə görə, Yeni İlin ilk günü gecə ilə gündüzün bərabər olduğu gündür. Bu şuşalıların ən sevimli bayramlarından biridir. Ona əvvəlcədən hazırlaşırdılar və xüsusi olaraq təntənəli surətdə qeyd olunurdu. Novruza hazırlıq gecə ilə gündüzün bərabərləşməsindən bir ay əvvəl başlayırdı. Bu ayın hər çərşənbə axşamında həyətlərdə, meydanlarda və Cıdır düzündə tonqal qalanırdı. Evlərdə Novruz üçün xüsusi səmənidən halva və eləcə də şəkərbura, paxlava, plov növləri hazırlanırdı. Axşamüstü fişəng atılıb, məşəl yandırırdılar. Kiçik piy şamlar evin həm içində, həm də çölündə qoyulurdu. Bayram günü şəhərin meydançalarında kəndirbazlar, oyunbazlar çıxış edir, teatr tamaşaları göstərilir və hər yerdə musiqi səslənirdi. Bayramın sonuna yaxın məsciddən ötən ildən qalan su gətirilib ərzaq tükənməsin deyə onun saxlandığı yerə tökürdülər. Sübh tezdən bulaq başına yollanıb burada arzu və istəklərini deyib, suyun üzərindən atlanıb, su ilə yuyunurdular. Bayramlarda Cıdır düzündə gəzintilər təşkil olunurdu. Qadınlar qızıl parlaq parçalardan tikilmiş rəngli və qızılı, gümüşü bəzəkli ən bahalı paltarlarını geyinirdilər. Kişilərin qara, yaşıl və qırmızı çuxaları, rəngli gen şalvarları, bahalı silahları və zərgərlik məmulatları heç nədə qadın geyimlərindən və bəzək-düzəklərindən geri qalmırdı.
Bölmənin digər xəbərləri
