Şuşada, Cıdır düzündə alovlandırılan tonqal hələ də Ermənistanı və tərəfdarlarını yandırır
Bakı, 5 aprel, AZƏRTAC
Prezident İlham Əliyevin Novruz bayramında Şuşada, Cıdır düzündə alovlandırdığı Bayram tonqalı xalqımızın səbirsizlikə gözlədiyi gün idi. Uzun illər idi ki, bu günü gözləyirdik. Müzəffər Ali Baş Komandanın bu il martın 20-də yenidən Şuşaya gedib Novruz bayramı münasibətilə Cıdır düzündə tonqal qalaması düşmənlərimizin söndürdüyü bayram tonqalını yenidən alovlandırdı. Bu tonqalın istisi işğalçı Ermənistanı və onun havadarlarını hələ də yandırır və bundan sonra da yandıracaq. Bu tonqal Azərbaycan Ordusunun gücünün, Müzəffər Ali Baş Komandan, möhtərəm Prezidentimizin xalqı daha böyük hədəflərə doğru aparacağının mesajını verdi.
Bunu AZƏRTAC-a açıqlamasında YAP Səbail rayon təşkilatı sədrinin müavini, politoloq Mehman İsmayılov bildirib.
Politoloq deyib ki, dövlətimizin başçısının Novruz müraciəti üçün məhz Şuşanı seçməsi təsadüfi deyildi. Möhtərəm Prezidentimiz xalqa müraciətində də Azərbaycanın tarixi torpaqlarının və onun mədəniyyət mərkəzi Şuşa şəhərinin azad edilməsini tarixi hadisə adlandırdı: “Bizim üçün torpaqların azad edilməsindən daha vacib bir vəzifə yox idi. Bu işdə Azərbaycan ordusunun başlıca xidməti var. Döyüşçülərimiz dağlarda və meşələrdə hərəkət edərək, qayalara dırmanaraq şəhəri azad etdilər. Şəhərin özündə onlar artilleriya və tanklara qarşı yalnız yüngül silahlardan istifadə edərək əlbəyaxa döyüşünə girdilər. Bu hərbçilər ən yüksək qiymətə layiqdirlər. Biz Şuşanı qan bahasına azad etdik. Şuşa uğrunda döyüşlərdə yüzlərlə, minlərlə işğalçı məhv edildi.
Şuşanın azad edilməsi Vətən Müharibəsinin kulminasiyası idi. Məhz bundan sonra düşmən kapitulyasiya aktını imzaladı”.
Mehman İsmayılov bildirib ki, Ermənilərin azərbaycanlılara qarşı törətdikləri dəhşətli soyqırımlarından biri məhz 1920-ci il martın 22-də, xalqımız üçün əziz olan Novruz bayramında Şuşada baş verib. 101 il öncə ermənilər ilk dəfə Şuşada bayramımızı qara gətirdilər. Əsgəran qalası ələ keçirildi, ölkənin hərbi potensialının Qarabağa, Şuşaya yönləndirilməsi işğalçı qüvvələrin yolunu açdı. Bir əsrdən sonra düşmənlərimiz layiqli cavablarını aldılar. Hələ də “böyük Ermənistan” xülyası ilə yaşayan separatçı ermənilərin faşist ideologiyası martın 22-də Şuşada Cıdır düzündə dövlət başçımızın alovlandırdığı bayram tonqalında yandırıldı, məhv edildi.
YAP Səbail rayon təşkilatı sədrinin müavini qeyd edib ki, ötən il Azərbaycanın tarixinə əbədi həkk olunmuş 44 günlük müharibədə qazandığımız misilsiz Qələbə Prezident İlham Əliyevin 2003-cü ildə qarşıya qoyduğu və bəyan etdiyi strateji hədəflərə nail olunmasının bariz nümunəsidir. İstər beynəlxalq miqyasda, istərsə də ölkə daxilində məqsədyönlü, ardıcıl, düşünülmüş siyasətin nəticəsi bu gün özünü bütün sahələrdə büruzə verir. Dövlətimizin başçısının həyata keçirdiyi uğurlu xarici və daxili siyasət artıq “güclü dövlət” konsepsiyasının reallaşdırıldığından xəbər verir.
“Təbii ki, işğalçı Ermənistan üzərində qazanılan tarixi Qələbəmiz, xüsusilə Şuşada, Cıdır düzündə qalanan Bayram tonqalı düşmənlərimizlə bərabər, beynəlxalq aləmdəki ədalətsiz qurumları, ikili standartlardan əl çəkə bilməyən bəzi dövlətləri, xüsusilə ermənipərəst qüvvələri ciddi narahat etməyə başlayıb. Özünü demokratiyanın beşiyi adlandıran, ancaq antidemokratik hərəkətlərini ört-basdır edə bilməyən Almaniyanın ölkəmizə qarşı təzyiq və təhdidləri başadüşüləndir. Bu gün Azərbaycanın Cənubi Qafqazın lider dövlətinə çevrilməsi Avropanın və Qərbin bir sıra dövlətləri tərəfindən həzm edilə bilmir. Almaniya “öz gözündə tiri qoyub” başqa ölkələrin gözündə tük axtarır. Bir neçə gündür ki, ölkədə, eləcə də digər Avropa ölkələrində başlanan qarşıdurmada polis dinc aksiya keçirən əhaliyə divan tutur. Öz əhalisinin etirazına dəyənəklərlə, xüsusi hazırlanmış atlarla, çirkli su şırnağı və digər vasitələrlə cavab verən Almaniyanın Azərbaycana qarşı ədalətsiz mövqeyi hansı demokratiyanın təzahürüdür?
Bu gün Azərbaycanın Avropanın enerji təhlükəsizliyində mühüm rol oynaması və Avropa İttifaqı ilə əlaqələrinin daha da möhkəmləndirilməsi, görünür, “demokratiyanın beşiyi” olan Almaniyanı və digər ermənipərəst qüvvələri ciddi narahat etməyə başlayıb və ya Ermənistanın neofaşizm ideologiyasına hüsn-rəğbəti Almaniya tərəfindən də dəstəklənir. Bütün bunlardan sonra “öz gözündə tiri qoyub başqasının gözündə tük axtaran” Almaniyanın haqq-ədalətdən danışmağa haqqı çatırmı?”, - deyə politoloq vurğulayıb.
Bölmənin digər xəbərləri
