Şuşalı təhsil işçiləri doğma şəhərlərində fəaliyyətlərini davam etdirəcəkləri günü səbirsizliklə gözləyirlər
Bakı, 26 yanvar, AZƏRTAC
Bu gün Azərbaycan təhsili özünün uğurlu inkişaf mərhələsini yaşayır. Son illərdə təhsil sahəsində aparılan köklü islahatlar öz nəticələrini verməkdədir. Təhsilimizə dövlət qayğısının ildən-ilə artması onun beynəlxalq standartlara cavab verməsini təmin edir.
Bu fikirləri AZƏRTAC-a Şuşa Rayon Təhsil şöbəsinin müdiri Təvəkkül Əliyev deyib. O bildirib ki, Şuşa rayonunda zəngin tarixə malik elm, təhsil ocaqları var. Belə təhsil ocaqlarından biri 192 yaşlı 1 nömrəli tam orta məktəbdir. Qocaman təhsil ocağı uzun və şərəfli inkişaf yolu keçərək birsinifli məktəbdən möhtəşəm tədris müəssisəsinə çevrilib.
Azərbaycanda ilk qəza məktəbi də 1830-cu il dekabrın 30-da Şuşada açılıb. Həmin gün bir sinif açılıb və 19 şagirdlə təlimə başlanılıb: “Şuşa şəhərində dünyəvi məktəbin açılması çox əlamətdar hadisə idi. Şuşada bu məktəbin açılması ilə Şimali Azərbaycanda Avropa tipli dünyəvi təhsilin əsası qoyulmuş oldu. Məktəb Şuşanın ictimai-siyasi, iqtisadi, mədəni həyatında böyük rol oynayıb.
Təvəkkül Əliyev məlumat verib ki, 1 nömrəli məktəb yarandığı vaxtdan 1992-ci ilin may ayınadək Şuşa şəhərində öz fəaliyyətini fasiləsiz olaraq davam etdirib. Məktəbdə hər cür avadanlıqla təmin olunmuş 24 fənn kabineti və laboratoriya, 2 linqafon, maşınşünaslıq, gənclərin çağırışaqədərki hazırlıq kabinetləri, zəngin kitabxana, geniş idman, akt zalı fəaliyyət göstərirdi. Şəhərin ermənilər tərəfindən işğalından sonra Şuşanın məktəbləri - 21 ümumtəhsil məktəbi və 2 məktəbdənkənar təhsil müəssisəsi respublikanın müxtəlif rayonlarında müvəqqəti fəaliyyət göstərir. Həmin məktəblərdə çalışan 626-dək pedaqoji işçi 6 mindən artıq şagirdin təlim-tərbiyəsi ilə məşğul olur. Müəllimlərin böyük hissəsi ali təhsillidir. Təhsil sisteminə daxil olan məktəblərin 14-ü Bakıda, 7-si respublikanın müxtəlif bölgələrində fəaliyyət göstərir.
Dövlət tərəfindən Şuşa təhsilinə həmişə böyük diqqət göstərilib. 1980-ci ildə ulu öndər Heydər Əliyevin təşəbbüsü ilə bu məktəbin 150 illik yubileyi qeyd olunub. 2010-cu ildə Cənubi Qafqazda birinci dünyəvi məktəb olan Şuşa şəhər 1 nömrəli orta məktəbin 180 illik yubileyi dövlət səviyyəsində qeyd olunub. 2011-ci ildə “Şuşa şəhər 1 nömrəli orta məktəbi üçün yeni binanın tikintisi ilə bağlı tədbirlər haqqında” Azərbaycan Respublikasının Prezidenti Sərəncam imzalayıb və 2015-ci ildə müasir standartlara cavab verən məktəb binası şagirdlərin istifadəsinə verilib. Gənclərimizin dünyanın aparıcı universitetlərində müxtəlif ixtisaslar üzrə təhsil almaları üçün hər cür şərait yaradılıb.
Bununla bərabər, son illərdə Kürdəxanı və Ramanada məcburi köçkünlər üçün salınmış şəhərciklərdə tikilmiş müasir tələblərə cavab verən məktəblər də şagirdlərimizin ixtiyarına verilib.
“Şuşa məktəbləri, Şuşa müəllimləri harada olmalarından asılı olmayaraq, uşaqların əsl vətəndaş kimi və vətənpərvər böyümələrinə, biliklərə yiyələnmələrinə məsuliyyətlə yanaşırlar. Bunun nəticəsidir ki, ali məktəblərə qəbul olan məzunların sayında son illərdə artım müşahidə olunur. Rayonun ümumi təhsil məktəblərinin şagirdləri respublika üzrə keçirilən fənn olimpiadalarında, müsabiqələrdə fəal iştirak edirlər. Gənclərimiz, yeniyetmələrimiz arasında Şuşa haqqında, onun tarixi keçmişi, bu günü və Şuşanın işğaldan azad olunması yolunda qəhrəmancasına şəhid olan insanlar barədə mütəmadi olaraq maarifləndirici söhbətlər aparılır.
Ötən il mayın 12-də Müzəffər Ali Baş Komandan İlham Əliyev tərəfindən Şuşada 1 saylı ümumtəhsil məktəbinin təməli qoyulub. 960 şagird yerlik tam orta məktəbin layihələndirilməsi və tikintisi məqsədilə Prezidentin ehtiyat fondundan Təhsil Nazirliyinə ilkin olaraq 3 milyon manat vəsait ayrılıb. Bütün şuşalı təhsil işçiləri doğma şəhərimizdə yaşayacaqları və yeni məktəb binalarında fəaliyyətlərini davam etdirəcəkləri günü səbirsizliklə gözləyirlər. Bu, onların həyatının ən xoşbəxt günü olacaq”, - deyə Təvəkkül Əliyev qeyd edib.
Bölmənin digər xəbərləri
