Bakı, 17 sentyabr, AZƏRTAC

2023-cü il ölkəmizin həyatında mühüm, qürurverici hadisələrlə zəngindir. Bu hadisələrin önündə gələn dövlət suverenliyimizin bərpası Azərbaycan xalqının yaddaşında əbədi qalacaq. Müzəffər Ali Baş Komandan İlham Əliyevin rəhbərliyi ilə yenilməz, məğrur Azərbaycan Ordusu Qarabağda separatizmin kökünü kəsməklə üzərinə düşən növbəti vəzifəni şərəflə yerinə yetirdi. Ötən il sentyabrın 19-da ölkəmiz üçtərəfli Bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı birləşmələrinin tərk-silah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması, Azərbaycanın Konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başladı. Bir sutkadan da az davam edən əməliyyat zamanı rəşadətli Azərbaycan Ordusu qarşıya qoyulan hədəflərə yüksək səviyyədə nail oldu. Azərbaycan istədiyini etdi, bütün şərtlərinin qəbuluna nail oldu. Növbəti qələbəmiz ordumuzun peşəkarlığının, döyüş ruhunun, planlı şəkildə fəaliyyətinin dünyaya təqdimatı idi.

Bu fikirləri Yeni Azərbaycan Partiyası (YAP) Xətai rayon təşkilatının sədri Vüqar Rəhimzadə AZƏRTAC-a açıqlamasında bildirib.

O, diqqəti tarixi Zəfərimizdən sonrakı dövrün bəzi hadisələrinə yönəldib. Vurğulayıb ki, 2021-ci ildə Azərbaycan və Ermənistanda sərhəd delimitasiyası üzrə işçi qruplar yaradıldı. Lakin çox təəssüflər olsun ki, danışıqlar bölgədə Ermənistanın hərbi təxribatları ucbatından baş verən silahlı toqquşmalarla müşayiət olundu. 2021-ci ilin noyabrında sərhəddə birinci silahlı toqquşmalar baş verdi. Müharibədən sonra ən qanlı toqquşma 2022-ci ilin sentyabrında Ermənistanla şərti sərhəddə baş verdi. 2023-cü ilin martında Azərbaycanın Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələri Şuşa istiqamətində növbəti təxribatlar törətdi, aprel və may aylarında isə şərti dövlət sərhədi istiqamətində Azərbaycan Ordusunun mövqeləri atəşə tutuldu. Separatçıların Qarabağda qeyri-qanuni fəaliyyətlərinə qarşı bir müddət Azərbaycanın bir sıra vətəndaş cəmiyyəti nümayəndələrinin və ekologiya fəallarının Şuşa-Laçın yolunda etiraz aksiyası keçirildi. Rusiya sülhməramlılarının həmin vaxt müvəqqəti yerləşdikləri Azərbaycan ərazilərindəki faydalı qazıntı yataqlarının qeyri-qanuni şəkildə istismar olunması, bu zaman ekoloji normalara əməl edilməməsi və təbii sərvətlərin Ermənistana daşınması Azərbaycan ictimaiyyətinin haqlı narazılığına səbəb olmuşdu. 2023-cü il aprelin 23-də Azərbaycan Dövlət Sərhəd Xidməti 2020-ci il 10 noyabr tarixli üçtərəfli Bəyanata zidd olaraq Ermənistandan Azərbaycan ərazisində olan qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının qarşısının alınması məqsədilə və Ermənistan tərəfindən 22 aprel tarixində birtərəfli qaydada Azərbaycan ilə sərhəddə - Laçın-Xankəndi yolunun girişində nəzarət buraxılış məntəqəsinin qurulmasına cavab olaraq Laçın-Xankəndi yolunun başlanğıcında "Laçın" nəzarət-buraxılış məntəqəsinin yaradıldığını bildirdi.

Ümumiyyətlə, suverenliyimizin bərpasına qədər atılan addımların xronologiyasına diqqət yetirdikdə Ermənistanın 30 illik işğal dövründə olduğu kimi, postmünaqişə mərhələsində də məsələlərin sülh yolu ilə həllində maraqlı olmadığını, daim himayədarlarının tapşırıqları əsasında hərəkət etdiyini görürük. Ölkəmiz həmişə sülhün tərəfdarı olub, hər bir məsələnin ədalət və beynəlxalq hüququn normaları və prinsipləri çərçivəsində həll olunmasına səy göstərib. 44 günlük İkinci Qarabağ müharibəsi zamanı da dünya ictimaiyyəti bunun şahidinə çevrilmişdi. Dövlətimizin başçısı İlham Əliyev xalqa hər bir müraciətində bildirirdi ki, qarşı tərəf torpaqlarımızın azad olunmasının qrafikini, tarixini versin, biz müharibəni dayandırmağa hazırıq. Qarabağın tacı Şuşanın işğaldan azad edilməsindən sonra düşmən məğlubiyyətini dərk etdi, ağ bayraq qaldırdı və Azərbaycan tərəfi müharibəni dayandırdı. 2020-ci il 10 noyabr tarixli üçtərəfli Bəyanat Azərbaycanın hərbi-siyasi Qələbəsinin, Ermənistanın kapitulyasiyasının təqdimatı oldu. Prezident İlham Əliyev suverenliyimizin bərpasından sonra ötən ilin 15 oktyabr tarixində Azərbaycan Bayrağını Xankəndi şəhərində ucaltdıqdan sonra xalqa müraciətində bu məqamı xüsusi qeyd etdi ki, xatırlayıram, o vaxt bəziləri sual verirdi ki, nə üçün biz o vaxt - noyabrın 10-da müharibəni dayandırmağa razılıq verdik: “Bu gün bax, burada durarkən bir daha bildirmək istəyirəm ki, biz hər şeyi vaxtında etməliyik və etmişik. Azərbaycan xalqının böyük əksəriyyəti o vaxt da - noyabrın 10-da və ondan sonrakı dövrdə çox yaxşı başa düşürdü ki, biz istədiyimizə nail olacağıq. İstədiyimiz isə bax, burada dalğalanan Azərbaycan Bayrağıdır”.

YAP Xətai rayon təşkilatının sədri diqqəti dövlətimizin başçısı İlham Əliyevin həmin müraciətdə yer alan bu çağırışına da yönəldib. Müzəffər Ali Baş Komandan İlham Əliyev bu inamı da ifadə etdi ki, atdığımız addımlar və antiterror tədbirlərinin nəticələri sülh danışıqları üçün maneəni aradan qaldıracaq. Bu, Cənubi Qafqazda yeni reallıq, uzunmüddətli sülh yaradacaq. Biz əmin olmalıyıq ki, qarşı tərəf revanşist fikirlərlə yaşamır və onlar da əmin olmalıdırlar ki, bizim onların torpağında gözümüz yoxdur. Azərbaycan bütün ölkələrin ərazi bütövlüyünü tanıyır: “Biz, sadəcə olaraq, tələb edirdik həm onlardan, həm onların arxasında duran və onlar üçün dar məqamda onların yanında olmayan, uzaqda, Avropada yerləşən dırnaqarası erməni cəfakeşləri bilsinlər - nə qədər uzaq dursalar bizim bölgəmizdən, o qədər də bölgə rahat nəfəs alacaq və biz bunu təklif edirik. Biz təklif edirik ki, Cənubi Qafqaz ölkələrinin gələcəyi sülhə, əmin-amanlığa, inkişafa söykənsin”.

Vüqar Rəhimzadə suverenliyimizin bərpasından ötən bir ildə müstəqillik tariximizdə ilk dəfə olaraq bütün ölkə ərazisini əhatə edən seçkilərdən bəhs edib. Bildirib ki, Ulu Öndər Heydər Əliyevin düşünülmüş və məqsədyönlü siyasəti nəticəsində yaradılmış möhkəm təməl üzərində ölkəmizi dünyaya qalib, bütövləşən, yeni Azərbaycan kimi təqdim edən dövlətimizin başçısı, Müzəffər Ali Baş Komandan İlham Əliyev yeni dövrün hədəflərini açıqlayarkən ordumuzun gücünün, qüdrətinin daha da artırılmasını prioritet məsələ kimi vurğulayıb. Günümüzün reallığı budur ki, müasir müharibələr əvvəlki müharibələrdən fərqlənir. Prezident İlham Əliyevin qeyd etdiyi kimi, İkinci Dünya müharibəsi ilə bugünkü müharibələri müqayisə etmək belə mümkün deyil və təbii ki, bir çox ölkələr bu gün hərbi sahəyə diqqət yetirməyə başlamışlar. Azərbaycan isə bunu artıq 20 ildən çoxdur ki, edir. Ölkəmizin əldə etdiyi döyüş təcrübəsi əvəzolunmazdır. Ordumuz təlimlərdə, paradlarda yox, döyüş meydanında öz gücünü göstərmişdir. Ermənistan və ona hərbi cəhətdən dəstək verənlər bilməlidirlər ki, bizi heç nə dayandıra bilməz. Əgər bizə qarşı ərazi iddialarına son qoyulmazsa, əgər Ermənistan öz qanunvericiliyini normal qaydaya salmazsa, təbii ki, sülh müqaviləsi olmayacaq.

YAP Xətai rayon təşkilatının sədri qeyd edib ki, tarixi Zəfərimizin və suverenliyimizin bərpasının yaratdığı reallıqlar Azərbaycanın beynəlxalq münasibətlər sistemində yerini və mövqeyini daha da möhkəmləndirir. Bu gün böyük qürur hissi ilə qeyd edirik ki, Azərbaycanın sözü imzası qədər əhəmiyyətlidir. Ölkəmizin xarici siyasət uğurları biri-birini əvəzləyir. Bu uğurları istər Azərbaycanın ayrı- ayrı dövlətlərlə ikitərəfli, eyni zamanda, beynəlxalq təşkilatlar çərçivəsində əlaqələrində, istərsə də ev sahibliyi etdiyi, Prezident İlham Əliyevin fəxri qonaq qismində qatıldığı tədbirlərdə görmək mümkündür. Bu gün qalibiyyət rəmzi olan üçrəngli Bayrağımızın Ağdamda, Füzulidə, Laçında, Cəbrayılda, Zəngilanda, Qubadlıda, Kəlbəcərdə, Şuşada, Hadrutda, Xocavənddə, Xocalıda, Ağdərədə, Əsgəranda, Xankəndidə dalğalanması ədalətə və beynəlxalq hüquqa söykənən siyasətimizin qələbəsidir.

Vüqar Rəhimzadə son bir ilin mühüm uğurları sırasında işğaldan azad edilmiş ərazilərimizdə geniş miqyas alan bərpa-quruculuq işləri fonunda soydaşlarımızın doğma yurd yerlərinə qayıdışını, bu torpaqlarda yeni həyatın başlanmasını xüsusi qeyd edib. Bildirib ki, ötən bir ildə sakinlərinə qovuşan Füzuli və Laçın şəhərlərinin sırasına Şuşa və Xocalı da daxil oldu. Bu ay Xankəndiyə və Cəbrayıla köç başlayacaq. İlin sonunadək Kəlbəcər də əzəli sakinlərinə qovuşan şəhərlər sırasında olacaq. İşğaldan azad edilmiş bütün ərazilərimizin müasir tələblər səviyyəsində yenidən qurulması hər birimizi qürurlandırır. Artıq bu ərazilərimizdə yeni həyat başlayıb. Bu ilin 28 May - Müstəqillik Günündə xocalılılar öz doğma yurd-yuvalarına qayıtdılar. Prezident İlham Əliyevin və birinci xanım Mehriban Əliyevanın Xocalı şəhərinə köçən sakinlərlə görüşündə dövlətimizin başçısı bu müjdəni də verdi ki, sentyabr ayında Xankəndi şəhərinə köç başlayacaq. 32 ildən sonra Şuşada, Xocalıda ilk Bilik Günü keçirildi. Eyni zamanda, Qarabağ Universiteti ilk tələbələrini qarşıladı. Tarixi Zəfərimizdən ötən 4 il biri-birindən qürurverici hadisələrlə zəngindir. Suverenliyimizin bərpası ilə yeni dövrə qədəm qoyan Azərbaycanın növbəti hədəflərindən biri tarixi ədalətə və beynəlxalq hüquqa söykənərək Qərbi Azərbaycana qayıdışdır. Bu hədəfin də gerçəkləşəcəyi gün uzaqda deyil.