Tarix İnstitutu: Almaniya nəşriyyatı Qafqaz Albaniyasının tarixini təhrif edib
Bakı, 12 iyun, AZƏRTAC
Almaniyanın akademik ədəbiyyat nəşri üzrə ixtisaslaşan “De Gruyter” nəşriyyatı Qafqaz Albaniyasına dair məlumat-sorğu kitabı nəşr edib.
AMEA-nın A.A.Bakıxanov adına Tarix İnstitutundan AZƏRTAC-a verilən məlumata görə, nəşriyyatın təqdim etdiyi xülasədə Azərbaycanın İkinci Qarabağ müharibəsindən sonra bölgənin tarixi, mədəniyyəti və mədəniyyət abidələrinə münasibətdə təftişçiliyindən bəhs olunur. Kitabda Qafqaz albanlarına dair tədqiqatların müasir vəziyyətinin obyektiv, elmi cəhətdən əsaslandırılmış icmalının verildiyi bildirilir. Qeyd edilir ki, toplu müxtəlif tədqiqat istiqamətləri üzrə dünya miqyaslı alim, tədqiqatçı və praktikləri birləşdirir.
Kitabla tanışlıq bu iddiaların tamamilə yanlış olduğunu sübut edir. Belə ki, bu kitabda Azərbaycan albanşünaslığı tamamilə inkar edilib, Azərbaycandan heç bir müəllif onun yazılmasına dəvət edilməyib. Kitabı əsasən ermənişünaslar və etnik erməni tədqiqatçıların (A. Drost-Abqaryan, A.Kazaryan, P.Donabedyan, H.Petrosyan, A.Akopyan və başqaları) iştirakı ilə yazılıb. Bu halda obyektivlikdən danışmaq qeyri-obyektivlikdən xəbər verir. Kitabın məlumat-sorğu xarakteri daşıması da təsadüfi deyil. Onu hazırlayanlar bununla daha geniş oxucu kütləsi cəlb etməyi hədəfləyir və anti-Azərbaycan təbliğatının tərkib hissəsi kimi çıxış edir. Bu fakt bir daha göstərir ki, müəyyən qüvvələr beynəlxalq miqyasda Qafqaz Albaniyasının elmi tarixinin tədqiqi əvəzinə, onu siyasi vasitəyə çevirməyə cəhd göstərir. Qeyd edilən kitab bu layihənin reallaşdırılmasının başlanğıcından xəbər verir.
Bölmənin digər xəbərləri
