TAV ŞİRKƏTİNİN SƏDRİ HƏMDİ AKININ ÇIXIŞI
-Hörmətli Gürcüstan Prezidenti!
Hörmətli Azərbaycan Prezidenti!
Hörmətli Türkiyənin Baş naziri!
Türkiyə, Gürcüstan və Azərbaycan hökumətlərinin hörmətli nazirləri!
Hörmətli mətbuat nümayəndələri!
Çox hörmətli qonaqlar!
Paytaxt Tbilisiyə yeni bir görkəm gətirən Tbilisi beynəlxalq hava limanının açılışı mərasiminə xoş gəlmisiniz. Hava yolu ilə yük daşınmasında Şərqlə Qərbi qovuşduracaq, Avropa ilə Asiya arasında körpü rolunu oynayacaq bu hava limanının istifadəyə verilməsi hamımız üçün tarixi hadisə və qürur mənbəyidir.
Bir ölkənin necə olmasını göstərən müasir terminal binaları ölkəyə giriş və çıxış baxımından böyük önəm daşıyır. Qafqaz bölgəsinin ən strateji və hava nəqliyyatı daşımalarında çox önəmli bir mərkəz olmaq yolunda sürətlə inkişaf edən Gürcüstanın Tbilisi və Batumi hava limanlarının tikintisinin TAV şirkətinə həvalə edilməsi bizim üçün sevindirici hal oldu. İnşaat işlərini qısa müddət ərzində uğurla başa çatdırdığımız bu layihədə İstanbuldakı Atatürk hava limanı, Ankaradakı Esenboğa hava limanı və İzmirdəki Adnan Menderes hava limanının tikintisində qazandığımız təcrübədən istifadə etdik. Terminallar və digər obyektlərlə birlikdə 90,5 milyon dollar sərmayə qoyduğumuz Tbilisi beynəlxalq hava limanı Türkiyənin “Tənə Akfen” (TAV) şirkətinə 20 illiyə icarəyə veriləcəkdir.
Bu layihənin bölgəyə gəlmək istəyən türk və digər əcnəbi sərmayəçilərin etibarlı və dost Gürcüstana sərmayə qoymaq baxımından böyük əhəmiyyəti vardır. Görülən bütün işlərdə göstərilən köməyə görə Gürcüstanın hökumət başçısına, iqtisadi inkişaf nazirinə və digər aidiyyəti təşkilatlara, eləcə də Batumi hava limanının tikintisinə verilən dəstəyə görə Acarıstan rəhbərliyinə və ümumiyyətlə, bu layihələrin uğurla həyata keçirilməsində dəstəyini əsirgəməyən Prezident Mixail Saakaşviliyə təşəkkür edirik. Bu layihənin gerçəkləşməsində diqqət və qayğısını bizdən əsirgəməyən Baş nazirimiz Rəcəb Tayyib Ərdoğan başda olmaqla, bütün Türkiyə təmsilçilərinə də minnətdarlığımı bildirirəm.
Çox hörmətli qonaqlar, TAV şirkəti gündən-günə böyüyür. Bu gün, sadəcə, Türkiyənin deyil, dünyanın ən böyük tikinti şirkətləri arasında adımız vardır. Bu il başa çatdıracağımız Batumi hava limanı və 2008-ci ildə tamamlanacaq Qətər dövlətinin Doha hava limanı ilə yanaşı, Yaxın Şərq, Qərbi Avropa, Şimali Afrika və Qafqaz kimi öndə gedən bölgələrdə yüksək hörmət qazanmış şirkət kimi inamla addımlayırıq. On ildə 10 hava limanının tikintisini qarşımıza məqsəd qoymuşuq və yeni layihələrlə beynəlxalq aləmdə önəmli işlər görərək, şirkətimizin beynəlxalq etibarını daha da gücləndirməyə çalışırıq. Əlbəttə, uğurlarımızın əsl mənbəyi olan əməkdaşlarımız gecə-gündüz işləyərək, minlərlə kilometr məsafəni yaxınlaşdıran işlər görərək, Türkiyənin mənafeyini uca tuturlar. TAV şirkəti ailəsinə sizlərin qarşısında bir daha təşəkkür edir, bundan sonra birgə neçə-neçə uğurlara imza atacağımıza ümid bəsləyirəm.
İcra etdiyimiz bu layihə sərmayə qoymaq üçün Gürcüstanın nə qədər etibarlı olduğunu göstərir. Bu gün gözəl bir gündür. Bir layihə başa çatarkən, yenisi başlayır. Bu dostluq və işbirliyi bu gün imzalanan Bakı-Tbilisi-Qars dəmir yolu layihəsi ilə daha da möhkəmlənəcək və beləliklə, tarixi İpək yolu dəmir yolu xətti ilə yenidən canlanacaqdır. Bu, Gürcüstanın, Azərbaycanın və Türkiyənin sülh, rifah və sabitlik yolunda əminliklə irəliləməsinin ən böyük göstəricisidir.
Hörmətli qonaqlarımız, çıxışımın sonunda Tbilisi və Batumi hava limanlarının bölgənin inkişafında oynayacağı rolu vurğulayaraq, ölkəm və şirkətim adından məmnunluğumu bir daha ifadə edir, hamınıza dərin hörmətimi bildirirəm. Sağ olun.
Bölmənin digər xəbərləri
