Bakı, 22 sentyabr, AZƏRTAC

Sentyabrın 22-də Bakıda Kibertəhlükəsizlik Günləri çərçivəsində keçirilən “Taxt Oyunları” (Game of Thrones) formatlı kiber yarışa start verilib.

AZƏRTAC xəbər verir ki, bu barədə “Azərbaycan Kibertəhlükəsizlik günləri” konfransı çərçivəsində jurnalistlərə açıqlamasında “Prosol” şirkətinin İdarə Heyətinin sədri Babək Ağayev deyib.

O qeyd edib ki, Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti və ölkənin ən böyük kibertəhlükəsizlik müəssisəsi olan “Prosol” şirkətinin birgə təşkilatçılığı ilə keçirilən bu kibermüharibə formatlı simulyasiya yarışında, ümumilikdə, 30 iştirakçının olduğu 10 komanda mübarizə aparacaq. Yarış 5 saat davam edəcək və məhdud vaxt çərçivəsində tapşırıqları uğurla yerinə yetirən, ən yüksək xal toplayan komanda “Taxt”ın sahibi (qalib) elan olunacaq.

Babək Ağayev bildirib ki, yarışın keçirilməsində məqsəd gənclərin bu sahəyə marağını artırmaq, həmçinin bu sahədə peşəkar fəaliyyət göstərmək istəyən şəxslərə dəstək olmaqdır.

“Prosol” şirkətinin İdarə Heyətinin sədri onu da xatırladıb ki, sentyabrın 23-də “Azərbaycan Kibertəhlükəsizlik günləri” konfransı çərçivəsində ən mühüm tədbirlərdən olan Azərbaycan Respublikasının dövlət qurumlarının “IT rəhbərlərinin II Zirvə toplantısı” baş tutacaq.