TBİLİSİ YAXINLIĞINDA KÜLLİ MİQDARDA SİLAH AŞKAR EDİLMİŞDİR
AZƏRTAC-ın müxbiri Tbilisidən xəbər verir ki, Gürcüstan Dövlət Təhlükəsizlik Nazirliyinin əməkdaşları noyabrın 2-də, parlament seçkiləri günü paytaxtın 15 kilometrliyində, Msxeta rayonu ərazisində Rusiyanın keçmiş hərbi obyektlərində külli miqdarda silah aşkar etmişlər. Dövlət təhlükəsizliyi naziri Valeri Xaburdzaniya bildirmişdir ki, bu cəbbəxana vətəndaş qarşıdurması yaradılması və ehtimal ki, dövlət çevrilişi törədilməsi üçün nəzərdə tutulmuşdu. Buradan 26 qutu avtomat patronu, 72 ədəd əl qumbarası, 9 ədəd tankvuran qumbara, 15 ədəd minaatan, beynəlxalq müqavilələrlə qadağan olunmuş 48 ədəd piyada əleyhinə mina, 23 kiloqramadək trotil, 22 kiloqramadək partlayıcı maddə, 53 ədəd tankvuran mərmi, 11 ədəd qumbaraatan, böyük miqdarda avtomat darağı tapılmışdır. Silahların hamısı Rusiyada istehsal edilmişdir.
Operativ məlumata görə, əvvəlcə xalqın toplaşdığı yerdə əl qumbarası partladılmalı, bunun ardınca isə hərbi yolla çevriliş edilməli idi. Bundan başqa, prezidentin avtomobilinin keçdiyi marşrutu və hökumət iqamətgahını minalamaq da planlaşdırılıbmış.
Bölmənin digər xəbərləri
