Təbrizdə nəşr olunan “Sərir Azərbaycan” qəzetində 20 Yanvar faciəsi barədə məqalə dərc edilib
Təbriz, 16 yanvar, AZƏRTAC
Təbrizdə nəşr olunan “Sərir Azərbaycan” qəzetində “20 Yanvar Azərbaycan Respublikasında Ümumxalq Hüzn Günüdür” başlıqlı məqalə dərc edilib.
AZƏRTAC xəbər verir ki, məqalədə 20 Yanvar hadisələrinin başvermə səbəbləri və nəticələri barədə məlumat verilir.
Bildirilir ki, bu il Azərbaycanın tarixinə 20 Yanvar faciəsi kimi daxil olmuş qanlı hadisələrin 30 ili tamam olur. 1990-cı il yanvar ayının 19-dan 20-nə keçən gecə SSRİ rəhbərliyinin Azərbaycana qarşı qərəzli siyasətinə, Dağlıq Qarabağa iddia edən Ermənistanın təcavüzkar siyasətinin dəstəklənməsinə etiraz olaraq ayağa qalxmış xalqa amansız divan tutuldu. Bu faciə nəticəsində 147 nəfər şəhid oldu, 744 nəfər yaralandı, 841 nəfər qanunsuz olaraq həbs edildi. Keçmiş sovet hərb maşınının Azərbaycanda törətdiyi bu qanlı qırğın mahiyyətinə görə dövlətin öz vətəndaşlarına qarşı tarixdə misli görünməmiş təcavüz aktı və qətliamı idi. Keçmiş SSRİ BMT Nizamnaməsinə, beynəlxalq hüquq normalarına məhəl qoymamış, iştirakçısı olduğu Mülki və Siyasi Hüquqlar Haqqında Beynəlxalq Paktın bir sıra müddəalarını pozmuşdu. Məhz belə bir ağır şəraitdə Azərbaycan xalqının ümummilli lideri Heydər Əliyev SSRİ-nin Azərbaycan xalqına qarşı həyata keçirdiyi qətliama öz cəsarətli etiraz səsini ucaltmışdır. Sovet İmperiyasının bütün təzyiqlərinə baxmayaraq, Heydər Əliyev yanvarın 21-də öz ailə üzvləri ilə birlikdə Azərbaycan SSR-in Moskvadakı daimi nümayəndəliyinə gələrək burada təşkil olunmuş, 6 minədək adamın iştirak etdiyi izdihamlı yığıncaqda çıxış etmiş, bu ağır günlərdə yaralı, heç yerdən kömək ala bilməyən doğma xalqı ilə birgə olduğunu bəyan etmişdir. O, çıxışında və verdiyi müsahibələrdə 20 Yanvar faciəsinə siyasi qiymət vermiş, əliyalın xalqın qətliamını hüquqa, demokratiyaya, humanizmə zidd addım, İttifaq və respublika rəhbərlərinin günahı ucbatından yol verilmiş kobud siyasi səhv kimi ifşa etmişdir. Heydər Əliyev qorxmadan, özü və ailəsi üçün yaranmış real təhlükəyə baxmayaraq, M.Qorbaçov başda olmaqla SSRİ rəhbərlərinin əsl simasını göstərmişdir. Heydər Əliyev Azərbaycan xalqına verdiyi başsağlığında onu bu ağır gündə təmkinli olmağa, həmrəyliyə və birliyə çağırmışdır. Ulu öndər Heydər Əliyevin tövsiyələrini rəhbər tutan Azərbaycan xalqı Bakıda fövqəladə vəziyyət olmasına baxmayaraq, yanvarın 22-də öz şəhidləri ilə vidalaşmışdır.
Sovet qoşunlarının Azərbaycanda törətdiyi qanlı qırğından 30 il keçməsinə baxmayaraq, xalqının azadlığını, şərəf və ləyaqətini hər şeydən üstün tutan qəhrəmanlar əsla unudulmur. Hər ilin 20 Yanvar tarixi Azərbaycan Respublikasında Ümumxalq Hüzn Günü kimi yad edilir. Bu tarix həm də Azərbaycanın suverenliyi, istiqlaliyyəti və ərazi bütövlüyü uğrunda mübarizənin rəmzidir. Çünki Azərbaycanın 20 Yanvar şəhidləri bu ali dəyərlər uğrunda canlarından keçmiş ilk qəhrəmanlardır. Azərbaycanın müstəqilliyi və suverenliyi uğrunda şəhid olanların xatirəsini əbədiləşdirmək məqsədilə ulu öndər Heydər Əliyevin 1998-ci il tarixli Fərmanı ilə Qanlı Yanvar faciəsi zamanı həlak olmuş Azərbaycan Respublikası vətəndaşları üçün “20 Yanvar Şəhidi” fəxri adı təsis edilmişdir. Hər il yanvar ayının 20-də başda Prezident İlham Əliyev olmaqla bütün dövlət və ictimaiyyət nümayəndələri Bakıdakı Şəhidlər Xiyabanını ziyarət edir və şəhidlərə öz ehtiramlarını bildirirlər.
Eləcə də Azərbaycanın bütün bölgələrindəki Şəhidlər xiyabanları yerli əhali tərəfindən ziyarət olunur. Həmin gün saat 12:00-da bütün ölkə ərazisində şəhidlərin xatirəsi bir dəqiqəlik sükutla yad edilir, respublikanın şəhər və rayonlarında, kənd və qəsəbələrində, o cümlədən xaricdəki diplomatik nümayəndəlik və konsulluqlarında 20 Yanvar faciəsinin ildönümü ilə əlaqədar hüzn əlaməti olaraq Azərbaycanın dövlət bayraqları yarıya endirilir və digər məlumatlandırıcı müxtəlif xatirə tədbirləri keçirilir.
SSRİ-nin yaratdığı informasiya blokadasına baxmayaraq, yanvarın 20-də artıq bütün dünya Bakıda törədilmiş dəhşətli qırğından xəbərdar edilə bilmişdir. Sovet qoşunlarının Bakıya hərbi müdaxiləsi dünyanın bir çox ölkələrində, o cümlədən qonşu İran İslam Respublikasında kəskin etirazlarla qarşılanmışdır. İranın Milli Təhlükəsizlik Şurası yığıncaq keçirərək bu barədə bəyanat qəbul etmiş, İran parlamentinin 160-dan çox üzvü M.Qorbaçovun Azərbaycana silahlı təcavüzünü pisləmişdir. İranın Ali Dini Rəhbəri və Prezidenti M.Qorbaçovun atdığı bu addımı kəskin tənqid etmişdilər. Bununla yanaşı, İranın kütləvi informasiya vasitələri sovet qoşunlarının Bakıda törətdiyi qanlı hadisəni kəskin tənqid edərək bu hadisələri qırğın adlandırmışdır.
Qanı bahasına öz müstəqilliyini əldə edən Azərbaycan bu gün dünyanın sürətlə inkişaf edən dövlətlərindən birinə çevrilib.
Rabil Kətanov
AZƏRTAC-ın xüsusi müxbiri
Təbriz
Bölmənin digər xəbərləri
