Tehranda Birgə Texniki Komissiyanın iclası keçirilib
Tehran 7 may AZƏRTAC
Mayın 7-də Tehranda “Azərbaycan ilə İran hökumətləri arasında Araz çayı üzərində “Xudafərin” və Qız Qalası” hidroqovşaqlarının və Su Elektrik Stansiyalarının (SES) tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş”in icrası məqsədilə yaradılmış Birgə Texniki Komissiyanın ilk iclası keçirilib.
AZƏRTAC xəbər verir ki, Azərbaycan tərəfindən komissiyanın həmsədri energetika nazirinin müavini Natiq Abbasov bildirib ki, həm SES-in, həm də hidroqovşaqların tikintisi Azərbaycan ilə İranın qarşılıqlı faydalı iqtisadi əməkdaşlıq əlaqələrinin inkişafından xəbər verir. Bu tikintilər hər iki ölkənin iqtisadi inkişafına təkan verməklə yanaşı sərhədyanı bölgələrdə yaşayan əhalinin sosial vəziyyətinin yüksəldilməsinə xidmət edir. N.Abbasov tikinti işlərinin sürətləndirilməsinin zəruriliyini də vurğulayıb.
Komissiyanın İran tərəfindən olan həmsədri, İranın energetika nazirinin müavini Cabbar Vətənfəda nəzərə çatdırıb ki, hidroqovşaqlarda toplanan su hər iki ölkənin sərhədyanı bölgələrində kənd təsərrüfatının inkişafına yardım edəcək.
Sonra saziş bəndlər üzrə müzakirə edilib. Qərara alınıb ki, tikinti işlərinə nəzarət etmək və ortaya çıxan problemlərin tez bir zamanda həll olunması üçün işçi qrupu yaradılsın. İclasda hidroqovşaqların inşa vəziyyəti ilə tanış olmaq üçün baxışın təşkili də planlaşdırılıb.
Sonra iclasın yekununa dair protokol imzalanıb. Komissiyanın növbəti iclasının cari ilin avqust ayında Bakıda keçirilməsi qərara alınıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
