Zamira İsayeva: Təhsil Azərbaycan-Özbəkistan əlaqələrinin möhkəmləndirilməsi üçün yeni imkanlar açır
Bakı, 26 avqust, AZƏRTAC
Ümumi tarixi və mədəni dəyərlər Azərbaycan ilə Özbəkistan arasında dostluq münasibətlərinin təhsil sahəsində də öz əksini tapması üçün geniş imkanlar yaradır. Bu prosesdə məktəblilərin birbaşa ünsiyyəti, birgə təşəbbüslər və gənc nəslin bir-birinin mədəniyyəti ilə tanış olması xüsusi əhəmiyyət daşıyır.
Bunu AZƏRTAC-ın müxbirinə Özbəkistanın Daşkənd şəhəri Mirabad rayonundakı 147 nömrəli məktəbin direktoru Zamira İsayeva deyib.
“Fikrimcə, gənc nəslin dost ölkələrin tarixini və mədəniyyətini daha yaxşı bilməsində məktəb ən mühüm rollardan birini oynayır. Azərbaycan ilə Özbəkistanı yalnız müasir diplomatik münasibətlər deyil, həm də dərin tarixi, mədəni və insani əlaqələr birləşdirir. Məktəb uşaqları hər iki ölkənin tarixi, ənənələri, ədəbiyyatı, milli mətbəxi, musiqisi və görkəmli şəxsiyyətləri ilə tanış edə bilər”, – deyə Z.İsayeva qeyd edib.
Onun sözlərinə görə, belə tanışlıq adi tədris prosesi çərçivəsindən kənara çıxmalıdır: “Bunun yalnız dərslərdə deyil, həm də birgə layihələr, məktəblilərin görüşləri, müsabiqələr, sərgilər, onlayn görüşlər və mübadilələr vasitəsilə həyata keçirilməsi çox vacibdir. Məhz şəxsi ünsiyyət vasitəsilə uşaqlar bir-birinin mədəniyyətini anlamağa və ona hörmət etməyə başlayırlar”.
Direktor iki ölkənin məktəbləri arasında birbaşa əlaqələrin qurulmasını perspektivli istiqamətlərdən biri hesab edir: “Bu gün əməkdaşlıq üçün imkanlar çox genişdir. Birgə təhsil layihələri, onlayn dərslər və konfranslar, olimpiadalar, yaradıcılıq müsabiqələri, müəllimlər arasında təcrübə mübadiləsi, ixtisasartırma proqramları, məktəb mübadilələri təşkil edilə bilər. Xüsusilə məktəblər arasında birbaşa əlaqələrin inkişaf etdirilməsi perspektivlidir. Məsələn, Daşkənddəki bir məktəbin Azərbaycanda tərəfdaş məktəbi ola bilər və şagirdlər tarix, mədəniyyət, ekologiya, dillər və müasir texnologiyalar üzrə layihələr üzərində birlikdə işləyə bilərlər. Belə layihələr uşaqlara dərslikdən əldə etdikləri məlumatdan qat-qat artıq imkanlar verir”.
“147 nömrəli məktəbin Azərbaycanla mədəni-maarif sahəsində qarşılıqlı fəaliyyət üzrə artıq öz təcrübəsi var. Şagirdlər mütəmadi olaraq Heydər Əliyev adına Azərbaycan Mədəniyyət Mərkəzinin görkəmli Azərbaycan şair və yazıçılarına, elmi və tarixi mövzulara, habelə bayramlara və əlamətdar günlərə həsr olunmuş tədbirlərində iştirak edirlər. Onların arasında Novruz bayramının qeyd edilməsi xüsusi yer tutur. Məktəbimizin həyətində Novruz bayramını qeyd etmək artıq gözəl ənənəyə çevrilib. Hər sinif müəyyən bir ölkə seçir və bayramın digər iştirakçılarını həmin ölkənin mədəniyyəti və ənənələri ilə tanış edir”, – deyə o bildirib.
Direktor əlavə edib ki, bayram zamanı məktəbin həyətində müxtəlif ölkələrin milli yeməklərinin, şirniyyatlarının və suvenirlərinin təqdim olunduğu tematik süfrələr açılır: “Belə əməkdaşlıq şagirdlərdə müxtəlif xalqların mədəniyyətinə, tarixinə və ənənələrinə hörmət hissinin formalaşdırılması baxımından böyük əhəmiyyət daşıyır. Digər parlaq nümunə 2023-cü ildə məktəblilərin Azərbaycana səfəri olub. Azərbaycan tərəfinin dəstəyi ilə 147 nömrəli məktəbin şagirdləri Azərbaycanda keçirilən Ümummilli Lider Heydər Əliyevin 100 illiyinə həsr olunmuş beynəlxalq olimpiadada iştirak ediblər. Səfər çərçivəsində şagirdlər Şuşaya da baş çəkiblər. Olimpiadanın nəticələrinə əsasən, məktəblilər ikinci yerə layiq görülüblər. Bu, sadəcə səfər və yarışda iştirak deyildi, həm də uşaqların özləri ilə evə apardıqları unudulmaz təcrübə, yeni biliklər, yeni tanışlıqlar və, əlbəttə, çoxsaylı parlaq və unudulmaz təəssüratlar idi”.
Gələcək perspektivlərdən danışan Z.İsayeva məktəbin Azərbaycan istiqamətini daha fəal inkişaf etdirməyə hazır olduğunu bildirib: “Məktəbimizdə “Azərbaycan Günləri” təşkil etmək, şagirdləri ölkənin tarixi və mədəniyyəti ilə tanış etmək, sərgilər, təqdimatlar, yaradıcılıq görüşləri və azərbaycanlı məktəblilərlə onlayn ünsiyyət keçirmək çox maraqlı olardı”.
Direktor, həmçinin 147 nömrəli məktəbə Heydər Əliyevin adının verilməsi imkanının reallaşmasını arzulayır: “Məktəbimiz faktiki olaraq Azərbaycan diasporunun çox sayda nümayəndəsinin yaşadığı rayonun mərkəzində yerləşir. Bundan əlavə, yaxınlıqda Heydər Əliyev prospekti, Heydər Əliyev parkı və Heydər Əliyev adına Azərbaycan Mədəniyyət Mərkəzi yerləşir. Bütün bunları nəzərə alaraq, fikrimcə, belə bir imkanın nəzərdən keçirilməsi həm rəmzi, həm də məntiqli olardı”.
Onun fikrincə, iki ölkənin məktəblilərini və pedaqoqlarını bir araya gətirən məhz belə təşəbbüslər daha dərin qarşılıqlı tanışlıq üçün şərait yaradır, Azərbaycan və Özbəkistan xalqları arasında dostluğun möhkəmlənməsinə töhfə verir.
Müxbir – Lalə Minasazova
Bölmənin digər xəbərləri
