Klipdən başlayan sevgi: yeddi ildir domra ifa edən azərbaycanlı gənc
Bakı, 26 avqust, AZƏRTAC
Xəzər Universitetinin birinci kurs tələbəsi Əmirli Adnan artıq yeddi ildir domra ifa edir. Onun bu alətə marağı təsadüfən izlədiyi bir musiqi klipindən başlayıb. Domranın səslənişini bəyənən gənc sonradan bu alətin ifa qaydasını özü araşdırıb və öyrənməyə başlayıb.
Adnan Əmirli AZƏRTAC-a açıqlamasında bildirib ki, domra ilə tanışlığı internetdə izlədiyi musiqi klipi ilə başlayıb. O, alətin səsini bəyəndikdən sonra onun haqqında araşdırma aparıb və qazaxların milli musiqi alətlərindən biri olduğunu öyrənib. “Özüm başlamışam, müəllimim olmayıb. Səslənişini və ifa qaydasını araşdırdım. İlk domramı Azərbaycanda tapdım. Qazaxıstandan gətirilmiş təxminən 60 illik bir domra idi. Onu aldıqdan sonra elə ilk iki saat ərzində üç-dörd musiqi ifa etməyə başladım”, – deyə gənc ifaçı bildirib.
O qeyd edib ki, sonradan özünü daha da təkmilləşdirərək Qazaxıstandan yeni domra sifariş etdirib. Adnanın sözlərinə görə, bu alətə marağı artdıqca Azərbaycan, Qazaxıstan və Qırğızıstanın ənənəvi musiqi alətləri arasındakı oxşarlıqlar da diqqətini çəkib.“Qazaxların domrası, qırğızların komuzu və Azərbaycanın sazı arasında çox yaxın əlaqə olduğunu düşünürəm. Biz türk dövlətləri olaraq eyni kökdən, eyni soydan gələn millətlərik və bu, musiqi alətlərində də özünü göstərir”, – deyə Adnan Əmirli vurğulayıb.
Qazaxıstanın domrası ikisimli, Qırğızıstanın komuzu isə üçsimli ənənəvi musiqi alətidir. Azərbaycan sazı ilə bu alətlər arasında müəyyən oxşarlıqların olduğunu deyən gənc ifaçı onları qədim türk musiqi ənənəsi kontekstində dəyərləndirir.
Adnan Əmirli öz araşdırmaları əsasında domranın qədim forması ilə Dədə Qorqudun qopuzu arasında da əlaqə olduğunu düşünür. O, bu fikrini musiqi dərsliyində Dədə Qorqudun əlində ikisimli alətin təsvir olunması ilə əlaqələndirir. “Mənim araşdırmalarım nəticəsində belə qənaətə gəlmişəm ki, domranın qədim forması Dədə Qorqudun qopuzu ilə əlaqələndirilə bilər. Bu alətlər qədimdən bu günə qədər Qazaxıstan və Qırğızıstanda qorunub saxlanılıb. Azərbaycanda isə saz zamanla daha da təkmilləşərək indiki formasını alıb”, – deyə o bildirib.
Gənc ifaçı domraya marağının şəxsi həvəsdən daha çox bu alətin yaşadılması istəyinə çevrildiyini söyləyib. Onun sözlərinə görə, Azərbaycanda domra nümunələri Azərbaycan Musiqi Mədəniyyəti Dövlət Muzeyində qorunur, lakin bu alətdə ifa edənlər çox azdır. “Bu mədəniyyəti yaşatmaq üçün məhz bu aləti seçmişəm. Azərbaycanda domra ifa edən insan demək olar ki, yoxdur. Ona görə də istəyirəm ki, bu alət tanınsın və onun ifa ənənəsi davam etsin”, – deyə Adnan Əmirli qeyd edib.
Bölmənin digər xəbərləri
