TƏHSİL NAZİRLİYİNDƏ GÖRÜŞ
Təhsil naziri Misir Mərdanov xaricdə oxuyan azərbaycanlı tələbələrlə görüşmuşdür.
Nazir görüşü açaraq bildirdi ki, azərbaycanlı tələbələr ötən əsrin əvvəllərindən, Azərbaycan Xalq Respublikasının movcud olduğu dövrdən xaricdə təhsil almağa başlamışlar. O zaman, hökumətin qərarı ilə 100 nəfər tələbə Rusiyanın, Türkiyənin, Fransanın və Böyük Britaniyanın müxtəlif universitetlərinə təhsil almağa göndəriləcəkdilər. Lakin az sonra baş verən ictimai-siyasi hadisələr bu planları pozdu. Tələbələrin çoxu xaricə gedə bilmədi. Buna imkan tapanlar isə təhsilini bitirəndən sonra xaricdə qaldılar.
Azərbaycanın hüdudlarından kənarda təhsil almaq imkanı 70-ci illərdə, respublikanın rəhbəri Heydər Əlivevin gənc nəslə böyük qayğısı sayəsində geniş vüsət aldı. Hər il Sovet İttifaqının müxtəlif ali təhsil ocaqlarına 700 tələbə göndərilirdi. Hazırda azərbaycanlı tələbələr təhsil nazirliyinin xətti ilə Türkiyənin, Rusiyanın, Misirin, Çexiyanın, Slovakiyanın, Rumıniyanın, Çinin ali məktəblərində oxuyurlar. 2 mindən çox azərbaycanlı qənc isə dünyanın 25 ölkəsində öz hesabına təhsil alır.
Azərbaycan vətəndaşlarının Türkiyədə təhsil alması 2 hökumətlərarası sazişlə tənzimlənir. Rusiya təhsil nazirinin bu ilin payızında Azərbaycana səfəri zamanı həmin ölkənin Təhsil Nazirliyi ilə də belə bir sənəd imzalanacaqdır. Sənəddə bu sahədə mövcud olan problemlər, o cümlədən tibbi sığorta, yataqxana ilə təminat məsələləri nəzərə alınacaqdır. Cari tədris ilində ölkəmizə Türkiyə ali məktəblərində 150 yer, Rusiyada 20 yer, habelə Türkiyə institutlarının magistratura və doktoranturasında 90 yer ayrılmışdır. Hər il 400-ə yaxın azərbaycanlı ABŞ Dövlət Departamentinin maliyyələşdirdiyi müxtəlif proqramlar xətti ilə bu ölkədə təhsil alır.
M.Mərdanov tələbələrə xeyir-dua verərək vurğuladı ki, onlar Azərbaycanı xaricdə ləyaqətlə təmsil etməli, təhsil aldıqları ölkələrdə müstəqilliyinin bu il 10 illik yubileyi geniş qeyd olunacaq dövlətimizin son illərdəki tarixi barədə həqiqəti çatdırmağa çalışmalıdırlar.
Nazir tələbələrin problemlərindən danışarkən işədüzəlməni ən mühüm problem kimi nəzərə çarpdırdı. Misir Mərdanovun sözlərinə görə, iqtisadi yüksəliş və sabitlik ən yaxın vaxtlarda bu problemi də həll etməyə imkan verəcəkdir.
Sonra Robert Şuman adına Strasburq universitetinin tələbəsi Mətin Kərimli, Moskva tibb akademiyasının tələbəsi Rüfət Əzizov və başqaları çıxış edərək mövcud problemlərdən, təhsildə və idmanda qazandıqları uğurlardan danışdılar. Xaricdə təhsil alan tələbələr öz cəmiyyətlərini yaratmışlar, Moskvada “Salam” qəzeti, Fransada Azərbaycan haqqında mə”lumat verilən fransızca bülleten nəşr edirlər. Avqust ayının əvvəllərində Bakida Azərbaycan tələbələri beynəlxalq ittifaqının tə”sis yığıncağı keçirilmişdir.
Misir Mərdanov tələbələrin problemlərinin aradan qaldırılacağına söz verərək onlara, təhsildə uğurlar arzuladı.
Bölmənin digər xəbərləri
