“TƏMİZ ŞƏHƏR” ASC-NİN MƏKTƏBLİLƏR ÜÇÜN YAY MƏKTƏBİ BAŞA ÇATMIŞDIR
Bakı, 30 iyul (AZƏRTAC). 2010-cu il “Ekologiya ili” çərçivəsində “Təmiz Şəhər” Açıq Səhmdar Cəmiyyətinin təşkilatçılığı ilə iyulun 26-dan həyata keçirilən məktəblilər üçün “Təmiz şəhər naminə” adlı yay məktəbi başa çatmışdır.
“Vətəndaş Cəmiyyətində Debat” İctimai Birliyinin dəstəyi ilə Quba şəhərinin Qəçrəş kəndində keçirilmiş yay məktəbində Bakı şəhərinin 24 məktəbindən 60 məktəbli iştirak etmişdir.
“Təmiz Şəhər”in sədri Zakir İbrahimov yay məktəbinin sonuncu günü şagirdlərlə görüşmüş ətraf mühitin mühafizəsi sahəsində görülən işlərdən danışmışdır. İştirakçılara tullantıların zərərsizləşdirilməsi üçün tikiləcək zavod haqqında məlumat vermişdir.
Tədris proqramının sonunda iştirakçılar arasında tullantıların idarə edilməsi və ətraf mühitin mühafizəsi mövzusunda debat yarışları keçirilmişdir.
Qeyd edək ki, tədbirin məqsədi yeniyetmələrin diqqətinin ətraf mühitin mühafizəsinə cəlb edilməsi və ekoloji maarifləndirilməsi, tullantıların düzgün idarə edilməsi, ekologiya sahəsində bilik və dünya görüşlərini genişləndirmək və ictimai müzakirələrin keçirilməsi olmuşdur.
Layihə çərçivəsində mütəxəssislər məktəblilərə ətraf mühitin mühafizəsi, bərk tullantıların idarə olunması, zərərsizləşdirilməsi haqqında mühazirələr oxumuşlar.
Bölmənin digər xəbərləri
