“Təmiz Şəhər” ASC tələbələr üçün təkrar xammala dair mühazirə təşkil edib
Bakı, 12 may, AZƏRTAC
“Təmiz Şəhər” ASC-nin nümayəndəsi Azərbaycan Dövlət Neft və Sənaye Universitetində (ADNSU) “Bərk məişət tullantılarının çeşidlənməsi və təkrar xammal bazarının inkişafı” mövzusunda mühazirə oxuyub.
ASC-nin mətbuat xidmətindən AZƏRTAC-a bildirilib ki, tələbələrə 2012-ci ildən Balaxanıda fəaliyyət göstərən Bərk Məişət Tullantılarının Çeşidlənməsi Zavodu haqqında məlumat verilib.
Bildirilib ki, paytaxtdan toplanılan məişət tullantıları bu zavoda təhvil verilir və burada çeşidlənir. Tullantının tərkibindəki təkrar emala yararlı əlvan və qara metallar, plastik, şüşə, karton kimi materiallar ümumi kütlədən ayrılır və toplanaraq xammal kimi təkrar emal müəssisələrinə göndərilir. Zavodun yaxınlığında Balaxanı Sənaye Parkı (BSP) salınıb ki, burada fəaliyyət göstərən müəssisələrin hamısı təkrar emalla məşğul olacaq. Dövlət təkrar xammal bazarının inkişafı üçün BSP-də fəaliyyət göstərəcək müəssisələri stimullaşdırır. Onlar “Təmiz Şəhər”in burada yaratdığı şəraitdən faydalanacaq, 7 il müddətinə vergilərdən azad olacaqlar.
Qeyd edilib ki, təkrar emal sənayesi həm tullantıların azaldılmasına, həm də ekologiyanın qorunmasına müsbət təsir göstərir.
Bölmənin digər xəbərləri
