Texnologiya müəllimi: Müasir təlim şagirdlərin yaradıcılıq imkanlarını genişləndirir
Bakı, 8 sentyabr, AZƏRTAC
Müəllimlik peşəsini seçməyimin əsas səbəbi uşaqları sevməyim və onların təhsilində, inkişafında, gələcəyində öz rolumun olması istəyimdir.
Bu fikri AZƏRTAC-a açıqlamasında 276 nömrəli tam orta məktəbin texnologiya müəllimi Nigar Qurbanova söyləyib. O deyib: “Uşaqların hazırladığı müxtəlif əl işlərini görmək peşəmin ən maraqlı və zövqverici tərəflərindəndir. Son illərdə təhsil prosesində ənənəvi təlim metodlarından interaktiv təlimə keçid daha da sürətlənib. Bu yanaşma şagirdlərin dərs prosesində fəal iştirakına, maraq və tələbatlarının nəzərə alınmasına geniş imkan yaradır. Şagirdlərin düşünməsi, araşdırması, yeni biliklər əldə etməsi və həmin bilikləri praktikada tətbiq etməsi təlimin daha səmərəli qurulmasına kömək edir”.
Müsahibimiz diqqətə çatdırıb ki, dərslərində müasir texnologiyalardan geniş istifadə etməyə çalışır: “Şagirdin məlumatı yalnız dinləməsi deyil, onu vizual şəkildə görməsi, araşdırması və tətbiq etməsi öyrənmə prosesinə marağı artırır. Elektron resurslar, animasiyalar və təqdimatlar texnologiya dərslərində istifadə etdiyim əsas vasitələr sırasındadır. Bu resurslar mövzuların daha aydın izah olunmasına və şagirdlərin dərsə fəal cəlb edilməsinə şərait yaradır. Müəllim və şagird arasında qarşılıqlı öyrənmə də təhsil prosesinin vacib hissəsidir. Uşaqların fərqli düşüncələri, yeniliklərə marağı və müasir texnologiyalardan istifadə bacarıqları müəllim üçün də yeni öyrənmə imkanları yaradır. Buna görə yaxşı müəllim yalnız öyrədən deyil, eyni zamanda, öyrənməyi davam etdirən, yeniliklərə açıq olan və şagirdlərindən də yeni fikirlər qəbul edən müəllimdir”.
O qeyd edib ki, müasir texnologiyaların tədrisə inteqrasiyası texnologiya fənninin imkanlarını daha da genişləndirir. Belə yanaşma şagirdlərin yaradıcı düşüncəsinin formalaşmasına, praktiki fəaliyyətə marağının artmasına və öyrəndiklərini real fəaliyyətlərdə tətbiq etməsinə imkan verir.
Müxbir - Tünzalə Arazlı
Bölmənin digər xəbərləri
