“The Daily Tribune-Bahrain” qəzetində Azərbaycanın Müstəqillik Gününə həsr olunmuş məqalə dərc edilib
Qahirə, 30 may, AZƏRTAC
Nüfuzlu “The Daily Tribune” qəzetinin Bəhreyn buraxılışında Azərbaycanın Səudiyyə Ərəbistanı və Bəhreyndəki səfiri Şahin Abdullayevin Müstəqillik Gününə həsr olunmuş məqaləsi dərc olunub.
AZƏRTAC xəbər verir ki, məqalədə İslam dünyasında ilk demokratik respublika olan Azərbaycan Xalq Cümhuriyyətinin elan edilməsinin 104-cü ildönümünün qeyd edildiyi, bu mütərəqqi dövlətin xalq hakimiyyəti, insanların bərabərliyi, irqi, dini, etnik, sinfi prinsiplər əsasında qurulduğu, bütün vətəndaşlar üçün eyni hüquqları təmin etdiyi vurğulanıb. Müəllif qeyd edib ki, Cümhuriyyətin böyük geosiyasi çətinliklərlə üzləşməsinə baxmayaraq, bir çox mütərəqqi islahatlar həyata keçirilib, o cümlədən bir sıra Avropa ölkələrindən də əvvəl qadınlara seçki hüququ verilib, həmçinin parlament, Milli Ordu yaradılıb, müttəfiq dövlətlərin liderləri ilə danışıqlara başlanılıb. 1920-ci il yanvarın 11-də keçirilən Paris Sülh Konfransında Azərbaycan Xalq Cümhuriyyətinin müstəqilliyi de-fakto tanınıb. Lakin 23 ay sonra qırmızı ordunun işğalı nəticəsində Cümhuriyyətin mövcudluğuna son qoyulub. 1991-ci ildə SSRİ-nin süqutundan sonra müstəqilliyini bərpa edən Azərbaycana qarşı Ermənistanın təcavüzü başlayıb və ərazilərimizin 20 faizi işğal olunub, bir milyondan artıq insan qaçqın və məcburi köçkünə çevrilib. Belə ağır dövrdə xalq ümummilli lideri Heydər Əliyevə müraciət edərək, onu ölkəni xilas etməyə çağırıb və dahi siyasətçinin səyləri ilə Azərbaycan qısa müddətdə bütün bu problemləri həll edərək yeni inkişaf dövrünə qədəm qoyub.
Məqalədə Ulu Öndərin rəhbərliyi ilə ölkəmizdə həyata keçirilən iqtisadi, siyasi islahatlar, “Əsrin müqaviləsi”, nəhəng transmilli neft-qaz və kommunikasiya layihələri barədə ətraflı məlumat verilib. Müəllif, həmçinin Prezident İlham Əliyevin rəhbərliyi ilə Azərbaycanın nüfuzlu beynəlxalq təşkilatlarda fəal iştirakından, BMT Təhlükəsizlik Şurasının qeyri-daimi üzvü seçilməsindən, 120 ölkəni birləşdirən Qoşulmama Hərəkatına sədrliyindən, İslam Əməkdaşlıq Təşkilatının işinə töhfəsindən də geniş bəhs edib. Diqqətə çatdırıb ki, məhz dövlətimizin başçısının düşünülmüş siyasəti nəticəsində ordumuz Vətən müharibəsində, cəmi 44 gün ərzində torpaqlarımızı azad edərək ərazi bütövlüyümüzü təmin edib.
Yazıda erməni işğalçılarının Qarabağda dağıtdıqları infrastruktur və mədəniyyət obyektləri, tarixi abidələr barədə məlumat verilib. Qeyd olunub ki, beynəlxalq ekspertlər məhv edilmiş Ağdam şəhərini “Qafqazın Xirosiması” adlandırıb. Ermənilər işğal dövründə 60-a yaxın məscidi dağıdıblar.
Müəllif işğaldan azad edilmiş ərazilərdə aparılan bərpa və quruculuq prosesi, qısa müddətdə inşa edilən Zəfər yolu, Füzuli Beynəlxalq Hava Limanı və s. haqqında da məlumat verib.
Məqalədə Azərbaycanın müstəqilliyini bərpa etdikdən sonra İslam dünyası, o cümlədən ərəb ölkələri ilə əməkdaşlığından bəhs olunub. Ş.Abdullayev qeyd edib ki, hazırda Səudiyyə Ərəbistanının “ACWA Power” şirkəti ölkəmizdə bərpa olunan enerji üzrə böyük layihə həyata keçirir. Azərbaycanın Bəhreyn Krallığı ilə əlaqələri də yüksələn xətlə inkişaf edir.
Müəllif ölkəmizin təşəbbüsü və liderliyi ilə həyata keçirilən nəhəng transmilli enerji və kommunikasiya layihələrindən də ətraflı bəhs edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
