“The Times”: Britaniyanın 2030-cu ilə qədər yeni silah almaq üçün vəsaiti yoxdur
Bakı, 4 may, AZƏRTAC
Böyük Britaniya maliyyə çatışmazlığı səbəbindən 2030-cu ilə qədər yeni silahların alınmasını həyata keçirə bilməyəcək.
AZƏRTAC xəbər verir ki, bu barədə Böyük Britaniya Strateji Komandanlığının keçmiş rəhbəri (2013–2016) Riçard Barrons “The Times” qəzetinə müsahibəsində bildirib.
2025-ci ilin iyununda qəbul edilmiş Strateji Müdafiə İcmalının həmmüəlliflərindən biri olan Barrons qeyd edib ki, Böyük Britaniya Silahlı Qüvvələri yalnız nəzəri olaraq müharibəyə hazırlıq barədə “düşünə” bilər. Onun sözlərinə görə, real vəziyyətdə yeni silahların alınması üçün maliyyə vəsaiti yoxdur.
Barrons bildirib ki, tanklar, helikopterlər və artilleriya kimi ənənəvi sistemlər üçün müəyyən vəsait mövcud olsa da, pilotsuz uçuş aparatları və süni intellekt əsaslı sistemlər kimi müasir texnologiyalar üçün maliyyə ayrılmayıb.
Onun sözlərinə görə, Müdafiə Nazirliyi icmal dərc olunduqdan sonra hərbi maliyyələşdirməni azaldıb. Barrons xəbərdarlıq edib ki, investisiya çatışmazlığı “sənaye bazasını zəiflədir” və müdafiə şirkətlərini istehsalı xaricə köçürməyə məcbur edir. “Vəsaitlər hazırda əlçatan deyil və daha dörd il ərzində də əlçatan olmaya bilər. Buna görə də bir çox aparıcı texnologiya şirkəti investisiyalarını Almaniya, Polşa və ya ABŞ-ə yönəldib ki, bu da sənaye bazasının tükənməsi riskini artırır”, — deyə o əlavə edib.
Bölmənin digər xəbərləri
