TİBB MÜƏSSİSƏLƏRİNİN İNŞASI UĞURLA DAVAM EDİR
AZƏRTAC xəbər verir ki, Dövlət Neft Şirkəti (ARDNŞ) regionların sosial-iqtisadi inkişafı Dövlət Proqramının uğurla həyata keçirilməsinə öz töhfəsini verir. ARDNŞ-in maliyyə vəsaiti hesabına Naxçıvan şəhərində, muxtar respublikanın Babək, Culfa, Şahbuz, Şərur və Ordubad rayonlarında tikintisinə ötən ildən başlanılan müalicə-diaqnostika mərkəzlərinin bu ilin sonuna qədər istifadəyə verilməsi nəzərdə tutulur. Bundan əlavə, inşasına cari ilin martında start verilən Əli Bayramlı müalicə-diaqnostika mərkəzinin tikintisi də cədvələ uyğun davam etdirilir. Gəncə şəhərində, Bərdə, Zaqatala, Qəbələ, Quba rayonlarında hazırda inşa edilən müalicə-diaqnostika mərkəzləri 2007-ci ildə istifadəyə veriləcəkdir. Balakən rayonundakı 235 çarpayılıq müasir xəstəxana kompleksinin isə 2008-ci ildə istifadəyə veilməsi planlaşdırılır. İnşa edilməkdə olan tibb ocaqlarının tikintisinə 60 milyon manat vəsait xərclənəcəyi gözlənilir.
İnşa edilən yeni tibb müəssisələri əhalinin sağlamlığının qorunmasına xidmət etməklə yanaşı, regionlarda yeni iş yerlərinin açılmasına, məşğulluğun artırılmasına da zəmin yaradacaqdır.
Bölmənin digər xəbərləri
