Türkiyə ölkədəki qoruq nisbətini 30 faizə çatdırmağı hədəfləyir
İstanbul, 10 iyun, Günel Karatepe, AZƏRTAC
Türkiyə ölkə üzrə qorunan ərazilərin əhatə nisbətini 2030-cu ilə qədər 30 faizə çatdırmağı hədəfləyir.
AZƏRTAC xəbər verir ki, bu barədə ölkənin Ətraf Mühit, Şəhərsalma və İqlim Dəyişikliyi Nazirliyindən bildirilib.
Verilən məlumata əsasən, son illər ölkə üzrə təbiətin mühafizəsi ilə bağlı görülən işlərin sürətləndirilməsi sayəsində 2011-ci ildə 6,22 faiz olan qoruq payı hazırda 13,30 faizə yüksəldilib. Nazirlik, eyni zamanda, ötən il başlatdığı 60 fərqli potensial təbii qoruq sahəsinə dair tədqiqatlarını da davam etdirir.
Xüsusi mühafizə olunan ərazilərin sayının artırılması məqsədilə aparılan işlər çərçivəsində, Təbii İrsi Qoruma Baş İdarəsi 7 yeni bölgənin müəyyənləşdirilməsini və hesabatlaşdırılmasını tamamlayıb. Bu ərazilərin rəsmi şəkildə elan olunması ilə ölkədə qoruq nisbətinin 13,30 faizdən 14,95 faizə yüksəlməsi gözlənilir.
Yeni mühafizə altına alınacaq bölgələr arasında Çanaqqala-Balıkəsir Kaz Dağları, Selçuk-Şirince, Bodrum Yarımadası, Sapanca Gölü, Adrasan, Kızılırmak Deltası və Cilo Buzlaq Dağları yer alır.
Bundan əlavə, son illər ərzində nazirlik 10 min 524 abidə ağacı və 304 mağara qeydiyyata alaraq mühafizəyə götürüb.
Bölmənin digər xəbərləri
