Türkiyə və Azərbaycan universitetləri birgə konfrans keçiriblər
Bakı, 19 may, AZƏRTAC
Mayın 16-18-də Mingəçevir Dövlət Universiteti (MDU), Azərbaycan Texniki Universiteti (AzTU) və Türkiyənin Qazi Universitetinin birgə təşkilatçılığı ilə “Heydər Əliyev İli” çərçivəsində 17 May - Ümumdünya Telekommunikasiya və İnformasiya Cəmiyyəti Gününə həsr olunmuş “Azərbaycan-Türkiyə əməkdaşlığı: İKT, energetika, logistika və ekoloji mühit” mövzusunda elmi-praktik konfrans keçirilib.
MDU-dan AZƏRTAC-a bildirilib ki, “ZOOM” platforması üzərindən onlayn formatda keçirilən konfransda hər üç ali təhsil müəssisəsinin professor-müəllim heyəti üzvləri, tələbə, magistrant və doktorantları iştirak ediblər.
Konfransın açılışında çıxış edən Qazi Universitetinin rektoru Musa Yıldız, AzTU-nun rektoru Vilayət Vəliyev və MDU-nun rektoru Şahin Bayramov iki qardaş ölkənin tərəfdaş universitetləri arasında əməkdaşlığın davamlı inkişafından məmnunluqlarını bildiriblər. Diqqətə çatdırılıb ki, hər il mayın 17-də qeyd olunan Ümumdünya Telekommunikasiya və İnformasiya Cəmiyyəti Günü bu il “İnformasiya və kommunikasiya texnologiyaları vasitəsilə ən az inkişaf etmiş ölkələrin imkanlarının artırılması” mövzusuna həsr olunub. Bu günün beynəlxalq səviyyədə qeyd olunması cəmiyyətlərin informasiya-kommunikasiya texnologiyalarından istifadənin verdiyi imkanlara, eləcə də rəqəmsal fərqliliyin aradan qaldırılmasına diqqəti çəkmək məqsədi daşıdığı bildirilib. Bu kontekstdə “Heydər Əliyev İli” çərçivəsində keçirilən üçtərəfli elmi tədbirin önəmini vurğulayan rektorlar, habelə regionda İKT, energetika, logistika və ekologiya sahəsində mövcud əməkdaşlıq imkanlarının və perspektivlərinin dəyərləndirilməsi baxımından konfransın əhəmiyyətindən danışıb, iştirakçılara uğurlar arzulayıblar.
Sonra konfrans 3 bölmə iclası ilə işini davam etdirib.
Konfransın “İnformasiya Kommunikasiya Texnologiyaları” adlı bölmə iclası mayın 16-da MDU-nun Mühəndislik fakültəsinin dekanı Almaz Əliyevanın moderatorluğu ilə keçirilib. Bölmə iclasında Qazi Universitetindən professor Ayhan Erdem “İnformasiya texnologiyalarının gələcəyi və generativ əvvəlcədən təlim edilmiş transformator”, professor Ercan Nurcan Yılmaz “Kritik infrastrukturlar və bu infrastrukturlarda kibertəhlükəsizlik”, professor Ali Akçayol “Süni intellekt keçmiş, indi və gələcəkdə”, dosent Sinan Toklu “Artırılmış reallıq”, AzTU-dan dosent Yadigar İmamverdiyev “Eks-sovet ölkələrində kriptoqrafik tədqiqatların vəziyyəti”, Adilə İmamverdiyeva “Zərərli proqramların analizinin tədris kursu haqqında” və MDU-nun müəllimi Məryəm Əsədova “Müxtəlif tətbiq səviyyələrində ağıllı şəhər hücum vektorlarının tədqiqi” mövzusunda məruzələrlə çıxış ediblər.
Mayın 17-də Qazi Universitetinin MDU-da fəaliyyət göstərən dosenti Sinan Toklunun moderatorluğu ilə “Energetika və Logistika” adlı bölmə iclası keçirilib. Bölmə iclasında Qazi Universitetindən professor Mustafa İlbaş “Türk dünyası enerji əməkdaşlığı: potensial imkanlar və təkliflər”, dosent Serhat Karyeyen “Elektrik Stansiyaları və əsas prinsiplər”, MDU-dan Liliya Süleymanova “Elektroenergetikanın ekoloji məsələlərinin həlli üzrə kompleks effektiv üsullar”, Səadət Şıxəliyeva “Еnerji resurslarından səmərəli istifadədə kombinəedilmiş buxar-qaz qurğularının rolu”, Qaragöz Kərimov "Azərbaycan regionun nəqliyyat-logistika mərkəzi kimi: reallıqlar və perspektivlər", AzTU-dan Əzimə Abbasova “Enerji sektorunda ağıllı müqavilələrin tətbiqi imkanları”, dosent Fuad Daşdəmirov “Azərbaycan Respublikasında logistik imkanlar: problemlər və perspektivlər” və Fərid Qasımlı “Milli radio-monitorinq sisteminin konseptual arxitekturası” mövzusunda məruzələr söyləyiblər.
Mayın 18-də “Ekoloji mühit” adlı bölmə iclası isə AzTU-nun dosenti Yadigar İmamverdiyevin moderatorluğu ilə keçirilib. Bölmə iclasında Qazi Universitetindən professorlar Cemal Yılmaz və Yusuf Sönmez “Bərpaolunan enerji mənbələrinin ətraf mühitə təsirləri”, AzTU-dan professor Fəxrəddin Yusubov “Azərbaycan Respublikasında suların təmizlənməsi texnologiyasının hazırlanması və tətbiqi”, Nəcibə Şirinova “Ətraf mühitin mühafizəsinin ən əlverişli üsulu - tullantıların təkrar emala cəlb olunması”, MDU-dan Aytac Cavadova “Heydər Əliyevin zəngin siyasi irsində ekoloji tarazlığın bərpa edilməsi prioriteti”, Leyla Əhmədova “Qlobal iqlim dəyişikliyinin ətraf mühitə təsiri” və Gülmirə Məmmədova “Meliorasiya və suvarma sahəsində Heydər Əliyevin dayanıqlı siyasəti” mövzusunda məruzələrlə çıxış ediblər.
Maraqla qarşılanan məruzələr ətrafında geniş müzakirələr aparılıb və iştirakçıların sualları cavablandırılıb.
Bölmənin digər xəbərləri
