Türkiyə xidmət ixracını dəstəkləmək üçün 270 milyon dollardan çox vəsait ayıracaq
Ankara, 27 fevral, AZƏRTAC
Türkiyə hökuməti bu il xidmət ixracını dəstəkləmək üçün 12 milyard lirə (təxminən 273 milyon dollar) ayırmağı planlaşdırır.
AZƏRTAC xəbər verir ki, Türkiyə Ticarət Nazirliyi ixracı dövlət tərəfindən dəstəklənəcək sənaye sahələrinin çeşidinin genişləndirildiyini bəyan edib.
Nazirlik xatırladıb ki, Türkiyənin xidmət ixracı 2002-ci ildə 14 milyard dollar dəyərində olsa da, ötən ilin sonuna qədər bu rəqəm 122,6 milyard dollara çatıb.
“Müasir Türkiyə xidmət ixracına görə dünyada 21-ci yerdədir. Ölkəmizin qlobal xidmət ixracındakı payı 0,89 faizdən 1,32 faizə yüksəlib”, - deyə nazirlik qeyd edib.
Ticarət Nazirliyi xatırladıb ki, Türkiyədə xidmət ixrac edən şirkətlərə dövlət dəstəyi proqramı 2012-ci ildən bəri davam edir və bu, satış bazarlarının genişlənməsinə töhfə verir.
Bu arada, inkişafları birbaşa dövlət tərəfindən stimullaşdırılan texnologiya şirkətlərinin sayı 50-yə çatıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
