Tyaqo Bolinha: Gürcüstan millisi ilə oyunun çətin olacağını bilirdik
Bakı, 24 yanvar, AZƏRTAC
Gürcüstan millisi ilə oyunun çətin olacağını bilirdik. Hətta bu matçı özümüz üçün finala bərabər hesab edirdik. Müsbət nəticə vacib idi. Heyətimizdəki itkilərə baxmayaraq, oyuna pis başlamadıq, lazım olan qolları vurduq. Məncə, yaxşı oynadıq. Oyunun davamında çox müdafiə olunduq. Belə də topsuz qaldıq, hərəkət etdik və yorğunluq başladı.
AZƏRTAC xəbər verir ki, bunu Niderlandda Avropa çempionatının final mərhələsində iştirak edən Azərbaycan millisinin futzalçısı Tyaqo Bolinha deyib.
Gürcüstan millisinin qol epizodları zamanı bəxtinin gətirdiyini bildirən futzalçı deyib: “Hesab 2:1 olan zaman biz yenidən üstünlüyümüzü 2 topa çatdıra bilərdik. Bunu bacarsaydıq, bəlkə də bu gün fərqli hesab haqda danışırdıq. Hakimlər də 2-3 həlledici məqamda səhv qərar verdilər. Felipinyo qapıçı ilə təkbətək qalmağa yaxın idi, amma referi ona qarşı olan cəriməni vermədi”.
“İspaniya ilə qarşılaşmamız daha çətin olacaq. Onlar qrupun yox, yarışın favoriti sayılırlar. Amma şansın varsa, sona qədər mübarizə aparmalı, hər məqamdan istifadə etməlisən. Biz də bunu edəcəyik. Azərbaycanın uğur qazanması üçün bacardığımızı meydanda qoyacağıq. Sona qədər inamlı olmalıyıq. Əgər növbəti oyunda Bosniya və Herseqovina Gürcüstanı məğlub etsə, şansımız yenə davam edəcək”, - deyə futzalçı əlavə edib.
Qeyd edək ki, millimiz növbəti oyununu yanvarın 26-da İspaniyaya qarşı keçirəcək. Oyun Bakı vaxtı ilə saat 23:30-da başlayacaq və İTV kanalı vasitəsilə canlı yayımlanacaq.
Bölmənin digər xəbərləri
