Ukrayna Rusiyanın Bryansk kimya zavodunu raketlərlə vurub
Kiyev, 22 oktyabr, AZƏRTAC
Oktyabrın 21-də Ukrayna Müdafiə Qüvvələri Rusiyanın Bryansk kimya zavodunu raketlərlə vurub.
AZƏRTAC xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.
Bildirilib ki, Ukrayna qüvvələri Rusiya ərazisində strateji hərbi-sənaye obyektlərinə zərbələr endirməkdə davam edir və bununla da Rusiya ordusunun hücum potensialını zəiflədir.
“Oktyabrın 21-də Ukrayna Silahlı Qüvvələrinin Hərbi Hava Qüvvələri Quru Qoşunları, Hərbi Dəniz Qüvvələri və Ukrayna Müdafiə Qüvvələrinin digər komponentləri ilə əməkdaşlıq edərək Bryansk kimya zavoduna zərbələr endirib”, - deyə məlumatda bildirilir.
Hazırda zərərin nəticələri dəqiqləşdirilir.
Baş Qərargah qeyd edib ki, Bryansk kimya zavodu Rusiyanın hərbi-sənaye kompleksinin mühüm tərkib hissəsidir. Konkret olaraq, bu zavod barıt, partlayıcı maddələr və raket yanacağı komponentləri, xüsusən də Rusiyanın Ukraynanı atəşə tutmaq üçün istifadə etdiyi sursat və raketlər istehsal edir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
