Ulu Öndər adını Azərbaycan tarixinə böyük hərflərlə yazdırmış dahi şəxsiyyətdir
Bakı, 14 dekabr, AZƏRTAC
Ulu Öndər Heydər Əliyev adını Azərbaycan tarixinə böyük hərflərlə yazdırmış dahi şəxsiyyətdir. Hər bir dövlətin, xalqın azadlıq və istiqlaliyyət tarixində xilaskar rolunu oynayan dahi liderləri var. Həmin şəxsiyyətlər öz qətiyyətləri ilə mənsub olduqları xalqı arxasınca aparıb, ən taleyüklü məqamlarla bağlı tarixi qərarlar veriblər. Ümummilli Lider Heydər Əliyev də Azərbaycan tarixinə parlaq və silinməz iz qoymuş böyük şəxsiyyət, müdrik dövlət xadimi kimi daxil olub.
Göstərdiyi xidmətlərlə, keçdiyi şərəfli yolla əbədilik qazanan Ulu Öndərin xatirəsi hər bir azərbaycanlının xatirəsində dərin hörmət və ehtiramla yaşayır. Yaşadığımız bu günlərə nəzər salarkən müdrik liderin fəaliyyəti, uzaqgörənliyi, xalq və dövlət qarşısında fəaliyyəti daha çox özünü göstərir.
Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
Politoloq qeyd edib ki, Ulu Öndər Heydər Əliyevin yenidən hakimiyyətə gəlişi ilə müstəqilliyimiz inkişaf edərək məhz onun sayəsində əbədi və dönməz xarakter aldı. Dahi Liderin 1969-1982-ci illərdə hakimiyyətdə olduğu zaman bugünkü müstəqilliyimizin təməlini təşkil edən milli ruh, azərbaycançılıq məfkurəsi yüksəlməyə başladı, kadrların milliləşdirilməsi istiqamətində qətiyyətli addımlar atıldı. Həmçinin hər il yüzlərlə gənc hərbi və digər mühüm sahələrdə təhsil almaq üçün SSRİ-nin ən qabaqcıl ali məktəblərinə göndərildi, azərbaycanlılar mühüm dövlət vəzifələrinə işə qəbul olundu.
“Totalitar sovet rejiminin hökm sürdüyü 1978-ci ildə Azərbaycan SSR Konstitusiyasının qəbul edilməsi və orada Azərbaycan dilinin dövlət dili kimi təsbit edilməsi Ümummilli Liderin səyi və xidmətidir. Həmin zaman imperiya siyasətinin tələbləri ilə tam ziddiyyət təşkil edən xalqın mənəvi sərvətinin qorunub saxlanılması və inkişaf etdirilməsi üçün hüquqi əsasların yaradılması cəsarətli addım idi.
SSRİ rəhbərliyinin 1990-cı ildə Bakıya ordunun yeridilməsi haqqında qərarına və qanlı faciənin törədilməsinə ilk etirazı Ulu Öndər Heydər Əliyev etmişdi. Faciədən bir gün sonra Azərbaycanın Moskvadakı nümayəndəliyinə gedərək xalqımızın kədərini bölüşməsi və sovet hakimiyyətinin ölkəmizdə həyata keçirdiyi qanlı aksiyanı ifşa etməsi o dövrdə xalqımıza bir dayaq, təsəlli oldu.
Naxçıvana rəhbərlik etdiyi 1991-1993-cü illərdə respublikamızın müstəqilliyi yolunda mühüm qərarlar verildi. Muxtar respublikanın adından “sovet sosialist” sözləri çıxarıldı, üçrəngli bayrağımız ilk dəfə Naxçıvanda dövlət bayrağı kimi qəbul edildi. Bundan əlavə, dünya azərbaycanlılarının həmrəyli günü qəbul olundu, 20 Yanvar faciəsinə siyasi qiymət verilərək SSRİ-nin saxlanılması barədə referendumdan imtina edildi.
Müstəqilliyimizin ilk illərində aparılan səriştəsiz siyasət, daxili çəkişmələr, düşmən qarşısında məğlubiyyət xalq tərəfindən Ümummilli Liderin yenidən hakimiyyətə gətirilməsini zəruri edirdi. Xalq bilirdi ki, Azərbaycanı düşdüyü bu ağır vəziyyətdən, sosial-iqtisadi, hərbi, siyasi böhrandan yalnız bir şəxs xilas edə bilər”,- deyə Y.Hacızadə vurğulayıb.
Azərbaycan xalqının iradəsi ilə ölkə rəhbərliyinə qayıdaraq müstəqil Azərbaycan Respublikasını, Azərbaycan xalqını, milli azadlıq hərəkatında qazanılmış tarixi nailiyyətləri məhv olmaqdan xilas etmək kimi çox çətin və şərəfli bir missiyanı öz üzərinə götürdü. Bu, Heydər Əliyevin özünün dediyi kimi “ömrünün qalan hissəsini də xalqına bağışlamaq” idi.
O bildirib ki, “Siyasət mümkün olanı etmək deyil, mümkünsüzü bacarmaqdır” kəlamında söylənildiyi kimi Ulu Öndər Heydər Əliyev Azərbaycanın qurulması, gələcək inkişafı üçün mümkünsüz görülən hər şeyi etdi. Fransız mütəfəkkiri Volterin “dövləti xilas etmək üçün bir dahi insan kifayətdir” sözləri də özünü doğrultmuş oldu.
Ona görə Ümummilli Liderin Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi əbədilik qazanması heç də təsadüfi deyil. Onun təməlini qoyduğu Azərbaycan diplomatiyası, iqtisadiyyatı, hərb sahəsi bu gün inkişaf dövrünü yaşayır. Dünyanın gərgin, münaqişələrlə dolu dövrünə qədəm qoyduğumuz bu günlərdə sabit ictimai-siyasi şərait, inkişaf edən iqtisadiyyat, güclü, dövlətin ərazi bütövlüyünü təmin edə bilən ordu dahi şəxsiyyətin əzminin, iradəsinin, uzaqgörənliyinin nəticəsidir.
Politoloq qeyd edib ki, Ulu Öndər böyük azərbaycanlıdır. Onun azərbaycançılıq nəzəriyyəsi bu gün bizim vahidliyimizi təmin etdi. Eyni zamanda, ölkəmizdə bütün millətlərin, etnik qrupların sülh içində yaşamasını formalaşdırdı. Onun nəticəsində bu gün böyük, vahid Azərbaycan xalqı öz ərazi bütövlüyü uğrunda heç bir etnik ayrı-seçkilik etmədən mübarizə aparmağa, döyüşməyə, şərəflə vətəni qorumağa hazırdır.
Ümummilli Lider Heydər Əliyevin formalaşdırdığı siyasi irs, ata vəsiyyəti Prezident, Müzəffər Ali Baş Komandan İlham Əliyev tərəfindən layiqincə, şərəflə, inkişaf etdirilməklə həyata keçirilir. Bu irs Azərbaycan dövlətinin siyasi konsepsiyasının əsasını təşkil edir.
Bölmənin digər xəbərləri
