Ulu Öndər Heydər Əliyev və milli-mədəni irsimiz – tədbir
Bakı, 13 dekabr, AZƏRTAC
AMEA Məhəmməd Füzuli adına Əlyazmalar İnstitutunda Ümummilli Lider Heydər Əliyevin vəfatının 20-ci ildönümü münasibətilə “Ulu Öndər Heydər Əliyev və milli-mədəni irsimiz” mövzusunda tədbir keçirilib. Əvvəlcə Ümummilli Liderin əziz xatirəsi bir dəqiqəlik sükutla yad edilib.
İnstitutdan AZƏRTAC-a bildirilib ki, tədbiri açan görkəmli ictimai-siyasi xadim, Əlyazmalar İnstitutunun fəxri professoru və Elmi şurasının üzvü, tarix elmləri doktoru Həsən Həsənov Heydər Əliyevin dahi lider kimi fəaliyyətindən, Azərbaycan ədəbiyyatı və mədəniyyətinə göstərdiyi qayğıdan bəhs edib. Ulu Öndərin milli-mədəni irsimizə verdiyi dəyərli töhfələrdən söz açan alim Əlyazmalar İnstitutunun Ulu Öndərin diqqət və qayğısı ilə əhatə olunan elmi müəssisələrdən biri olduğunu vurğulayıb.
Tədbirdə çıxış edən elmi katib filologiya üzrə fəlsəfə doktoru, dosent Əzizağa Nəcəfov “Heydər Əliyev İli”ndə Əlyazmalar İnstitutunda görülən işlərdən söz açıb, Ulu Öndərin irsinin tədqiqi ilə bağlı ərsəyə gələn nəşrlər, məqalələr, konfrans materialları, sərgilər barədə ətraflı məlumat verib. O, Ümummilli Liderin 100 illik yubileyi münasibətilə Əlyazmalar İnstitutunun Biblioqrafiya şöbəsinin nəşrə hazırladığı “Heydər Əliyev AMEA Məhəmməd Füzuli adına Əlyazmalar İnstitutu əməkdaşlarının tədqiqatlarında” adlı annotasiyalı biblioqrafik göstəricini tədbir iştirakçılarının diqqətinə çatdırıb. Qeyd edib ki, burada institut əməkdaşlarının Ümummilli Lider haqqında nəşr etdirdikləri 6 kitab, 26 məqalə haqqında məlumat və 48 konfrans materialları əksini tapıb. Alim biblioqrafik göstərici əsasında elektron baza və geniş kitab sərgisinin də hazırlandığını qeyd edib.
Tədbirdə institutun ərsəyə gətirdiyi “Heydər Əliyev və Əlyazmalar İnstitutu” adlı sənədli film ilk dəfə nümayiş olunub. Filmin ssenari müəllifi AMEA Məhəmməd Füzuli adına Əlyazmalar İnstitutunun direktoru akademik Teymur Kərimli, rejissoru və yaradıcı qrupun rəhbəri Elektron resurslar şöbəsinin əməkdaşı Xatirə Cabbarzadədir. Filmdə Ulu Öndərin Respublika Əlyazmalar Fondunun Əlyazmalar İnstitutuna çevrilməsində, onun maddi-texniki bazasının möhkəmləndirilməsi və fondlarının zənginləşdirilməsində, əlyazmaların daha yaxşı şəraitdə mühafizə olunması üçün bu gün fəaliyyət göstərdiyi binaya köçürülməsində, müəssisəyə dahi Azərbaycan şairi Məhəmməd Füzulinin adının verilməsindəki misilsiz xidmətlərindən ətraflı bəhs edilib.
Filmin çəkilişində Əlyazmalar İnstitutunun ən təcrübəli əməkdaşlarından filologiya elmlər doktorları - Paşa Kərimov və Raqub Kərimovun, tarix elmləri doktoru Tahirə Həsənzadənin, görkəmli əlyazmaşünas Arif Ramazanovun müsahibələrindən istifadə olunub, institutun elmi katibi Əzizağa Nəcəfov, baş mühafiz Səbinə Əhmədova, şöbə müdirləri - Nigar Babaxanova, Aynur Nəcəfova və institutun əməkdaşları Əsmər Hümbətli, Səadət Mustafayeva, Çinarə Qəbulova, Türkan Süleymanova və Arzu Ədilova yaxından iştirak ediblər.
Bölmənin digər xəbərləri
