Ölkəmizin baş energetika idarəsi olan “Azərenerji” Açıq Səhmdar Cəmiyyəti ictimaiyyətlə və mətbuatla əlaqənin daha şəffaf, sıx qurulmasına xüsusi diqqət yetirir. Bu istiqamətdə bir-birindən maraqlı layihələr icra olunur.

AZƏRTAC xəbər verir ki, belə tədbirlərdən biri də ümummilli liderimiz Heydər Əliyevin 85 illik yubileyi ilə əlaqədar KİV nümayəndələrinin Azərbaycan İstilik Elektrik Stansiyasına səfərinin təşkilidir.

KİV nümayəndələri əvvəlcə Azərbaycan İES-in mərkəzi binasında yerləşən Heydər Əliyev muzeyi ilə tanış olmuşlar.

Muzeyin direktoru Sevda Abdullayeva bildirmişdir ki, burada dünya şöhrətli siyasi xadim, müstəqil dövlətimizin memarı və qurucusu, ulu öndər Heydər Əliyevin şərəfli ömür yolunu əks etdirən eksponatlar, müxtəlif sənədlər və fotoşəkillər saxlanılır. “Heydər Əliyev və Mingəçevir” bölməsi tamaşaçılarda xüsusilə böyük maraq doğurur.

Sonra elektrik stansiyasına baxış keçirilmişdir. İştirakçılara stansiyanın tarixi barədə məlumat verilmişdir.

Azərbaycan İES-in direktoru Bəhmən Nəcməddinov bildirmişdir ki, 1969-cu ildə ümummilli liderimiz Heydər Əliyevin Azərbaycan rəhbərliyinə gəlişindən sonra respublikanın sosial-iqtisadi həyatının mühüm sahələrindən biri olan energetika sektorunun sürətli inkişafını təmin etmək məqsədi ilə təxirəsalınmaz tədbirlər həyata keçirilmiş, bir çox irimiqyaslı layihələr reallaşdırılmışdır.

Ulu öndərimiz Heydər Əliyevin bilavasitə təşəbbüsü və rəhbərliyi ilə ötən əsrin 70-ci illərinin əvvəllərindən etibarən, respublikanın elektrik enerjisinə olan tələbatının yerli imkanlar hesabına ödənilməsinə yönəlmiş layihələrin həyata keçirilməsinə başlanmışdır. Həmin dövrdə respublikada elektrik enerjisinin istehsalı 12 milyard kilovat-saatdan, istehlak isə 11,3 milyard kilovat-saat olmuşdur. Bununla belə, sürətli inkişafda olan iqtisadiyyatın durmadan artan tələbatı Azərbaycanı qonşu respublikalardan 2,9-3,5 milyard kilovat-saat elektrik enerjisi idxal etmək məcburiyyətində qoyurdu. Bu çatışmazlığı aradan qaldırmaq üçün tez bir zamanda “Şəmkir” SES-in və “Azərbaycan” DRES-n inşasına başlamaq qərara alınmışdır.

Elektrik stansiyasının birinci enerji bloku 1981-ci il oktyabrın 20-də ulu öndərimiz Heydər Əliyevin təşəbbüsü və bilavasitə rəhbərliyi ilə istifadəyə verilmiş, bu möhtəşəm hadisə Azərbaycan energetikasının inkişafında yeni bir mərhələnin əsasını qoymuşdur. Heydər Əliyevin səyi nəticəsində bu stansiyanın inşası prosesinin ümumittifaq səviyyəsində aparılması tikinti prosesinə ən peşəkar mütəxəssislərin cəlb olunmasına, müasir texniki vasitələrdən istifadəyə şərait yaratmışdır.

“Azərbaycan” DRES-in birinci enerji blokunun işə salınması ölkəmizdə əlamətdar hadisəyə çevrilmişdir. Ümummilli liderimizin bu münasibətlə 1981-ci il oktyabrın 20-də Mingəçevir şəhərinə gəlişi, stansiyanın vəziyyəti ilə tanış olaraq energetiklərə və inşaatçılara öz dəyərli tövsiyələrini verməsi bu tarixi təqvimi Azərbaycan energetiklərinin peşə bayramı günü kimi müəyyənləşdirmişdir. Ulu öndər Heydər Əliyevin respublikamıza bəxş etdiyi nəhəng iqtisadi layihələr sırasında xüsusi yeri olan “Azərbaycan” DRES Cənubi Qafqazda ən iri elektrik stansiyasıdır.

Stansiya hər birinin gücü 300 meqavat olan 8 enerji blokundan ibarət, kritik parametrdən də yüksək parametrlərdə işləmək imkanına malikdir. Hazırda respublikada istehsal edilən elektrik enerjisinin 50 faizə yaxını bu stansiyanın payına düşür.

Xüsusi vurğulanmışdır ki, Prezident İlham Əliyevin göstərişinə əsasən, Azərbaycan İstilik Elektrik Stansiyasının 7 enerji blokunda yenidənqurma işləri aparılmışdir. Blokların tamamilə yenidən qurulması nəticəsində energetika sistemində 600 meqavat əlavə güc əldə olunmuş, stansiyanın ümumi gücü 2640 meqavata çatdırılmışdır. Layihənin həyata keçirilməsi ildə 800 min ton yanacağa qənaət etməyə imkan vermişdir.

Milli elektroenergetikamızın bel sütununu təşkil edən bu stansiya indi də müstəqil dövlətimizin enerji təhlükəsizliyinin təmin olunmasında müstəsna rola malikdir. Enerji obyektinin istismara verilməsi ilə elektroenergetikamızda başlanan inkişaf və tərəqqi prosesi nəticəsində respublikamız sonralar özünün müstəqil, dayanıqlı enerji sistemini formalaşdıra bilmişdir.

Bildirilmişdir ki, ulu öndərimiz Heydər Əliyevin ən böyük xidmətlərindən biri də respublikamızın enerji təhlükəsizliyi məsələsinin həllinə hələ ölkəyə birinci rəhbərliyi dövründə nail olmasıdır. Bu nailiyyət Azərbaycanın dövlət müstəqilliyinin elan edildiyi çətin və mürəkkəb siyasi şəraitdə ölkəmizi regionda xüsusi maraqları olan xarici dövlətlərin enerji təhdidlərindən qorumuşdur.

Məhz bunun nəticəsidir ki, ötən əsrin 90-cı illərinin sonlarında elektrik enerjisi istehsalı 23,4 milyard kilovat-saata çatdırılmışdır. İstehlak isə 21,7 milyard kilovat-saata yaxın olmuşdur. 1,7 milyard kilovat-saat elektrik enerjisi ixrac edilmişdir. Adambaşına düşən elektrik enerjisi isə 3300 kilovat-saatdan artıq olmuşdur.

Sovet İttifaqının süqutu elektrik energetikası sisteminə də təsirsiz ötüşməmişdir. Yaranmış siyasi və iqtisadi böhran nəticəsində elektrik enerjisi istehsalında böyuk problemlər yaranmışdır. Ulu öndər Heydər Əliyevin uzaqgörən siyasəti nəticəsində tikilmiş “Azərbaycan” İES olmasaydı respublikanın, o cümlədən paytaxt Bakının enerji təchizatında ciddi problemlər yaşana bilərdi.

Qeyd olunmuşdur ki, ümumiyyətlə, ulu öndərimiz Heydər Əliyevin həyata keçirdiyi məqsədyönlü siyasət hesabına 3500 meqavata yaxın generasiya gücü işə salınmışdır. Elektrik enerjisi istahsalı isə təxminən 12 milyard kilovat-saatdan 22 milyard kilovat-saatadək - 1,8 dəfədən çox artmışdır. İqtisadiyyatın sürətli inkişafı, əhalinin həyat tərzinin yaxşılaşması sayəsində istehlak isə 11,3 milyard kilovat-saatdan 23 milyard kilovat-saatadək artmış, 2 dəfədən çox olmuşdur. Bununla yanaşı, Azərbaycan enerji sisteminin Rusiya, İran, Gürcüstan və Naxçıvan MR tərəfdən Türkiyə enerji sistemləri ilə sıx əlaqəsi təmin olunmuşdur.

Azərbaycanın enerji potensialının möhkəmləndirilməsində müstəsna xidmətləri olan ümummilli liderimiz Heydər Əliyevin elektrik energetikası sahəsində həyata keçirdiyi möhtəşəm quruculuq işləri bu gün yeni bir vüsətlə davam etdirilir. Ulu öndərin möhkəm zəmin üzərində qurduğu müasir Azərbaycan dövləti onun layiqli davamçısı Prezident İlham Əliyevin həyata keçirdiyi məqsədyönlü strateji xətt sayəsində beynəlxalq aləmdə öz nüfuzunu gücləndirir. Hazırda iqtisadiyyatı gündən-günə inkişaf edən, enerji sisteminin dayanıqlığı getdikcə yüksələn Azərbaycanda yeni generasiya güclərinin tikilib istifadəyə verilməsi respublikamızı elektrik enerjisi ixrac edən ölkəyə çevirməkdədir.

Xüsusi vurğulamışdır ki, ölkə energetikləri həmişə olduğu kimi, bundan sonra da dövlətimizin enerji təhlükəsizliyinin möhkəmləndirilməsi, xalqımızın rifahının daha da yüksəldilməsi naminə ümummilli liderimiz Heydər Əliyevin ideyalarının gerçəkləşməsi üçün var gücü ilə çalışacaq, ulu öndərimizin layiqli davamçısı, Prezident İlham Əliyevin ətrafında daha sıx birləşərək, qarşıya qoyulmuş mühüm vəzifələrin yerinə yetirilməsinə nail olacaqlar.