Ülvi Mehdiyev: Vətəndaşlardan xahiş olunur ki, SMS icazə xidmətindən təyinatına uyğun istifadə etsinlər
Bakı, 20 iyun, AZƏRTAC
İyunun 21-dən etibarən iki həftə ərzində 8 şəhər və rayonda xüsusi karantin rejiminin sərtləşdirilmiş forması tətbiq olunacaq. Karantin rejimi müddətində bir çox sahələrin fəaliyyəti qadağan edilir. Nazirlər Kabinetinin qərarı ilə müəyyən sahələrin fəaliyyətinə icazə verilir. Fəaliyyətinə icazə verilən, yəni Nazirlər Kabinetinin Qərarı ilə siyahısı müəyyən olunmuş dövlət müəssisə və təşkilatların və özəl qurumların əməkdaşları barədə məlumatlar elektron imzadan istifadə edilməklə icaze.e-gov.az portalına daxil edildikdən sonra onların hərəkətinə yol veriləcək. Vətəndaşların yaşayış yerini tərk etməsi xüsusi SMS icazə sistemi vasitəsilə həyata keçiriləcək. Evdən çıxmaq istədiklərinə dair icazə əldə etmək üçün vətəndaşlar mobil nömrədən icazənin məqsədini bildirən xüsusi kodu, eyni zamanda, şəxsiyyət vəsiqəsinin seriya və nömrəsini SMS-lə 8103 qısa nömrəsinə göndərməlidirlər. Vətəndaşlara lazım bilmədiyi təqdirdə ümumiyyətlə yaşayış yerini tərk etməmələri tövsiyə olunur.
AZƏRTAC xəbər verir ki, bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev Nazirlər Kabineti yanında Operativ Qərargahın iyunun 20-də keçirilən brifinqində söyləyib.
Onun sözlərinə görə, icazələrin məqsədinə dair 2 kod təyin edilib: “1 nömrəli kod təxirəsalınmaz tibbi zərurətlə və hər hansı bir qrafik üzrə müalicə almaqla əlaqədardır. İcazə rayon və şəhər daxilində 2 saat müddətinə verilir. Müalicə prosedurunun müddəti uzanarsa, geri qayıtma müddəti həkim tərəfindən verilən arayışla müəyyən edilir.
2 nömrəli kod ərzaq və digər gündəlik tələbat mallarının, habelə dərman vasitələrinin alınması, dövlət xidmətlərinin, bank, poçt və fəaliyyətinin davam etdirilməsinə icazə verilən iş və xidmət sahələrində göstərilən digər xidmətlərdən istifadə edilməsi zərurəti, həmçinin açıq havada vaxtın keçirilməsi ilə əlaqədar yaşayış yerini və olduğu yeri tərk etmək üçündür. İcazə 2 saat müddətinə gündə 1 dəfə verilir.
Yaxın qohumun dəfnində iştirak üçün vətəndaşlar Daxili İşlər Nazirliyinin 102 “Qaynar xətt”i ilə əlaqə saxlamalıdırlar.
SMS icazə xidmətindən həm Azərbaycan vətəndaşları, həm də ölkəmizdəki əcnəbilər istifadə edə biləcəklər.
“Vətəndaşlardan xahiş olunur ki, SMS icazə xidmətindən təyinatına uyğun istifadə etsinlər. Aprelin əvvəllərində SMS icazə xidməti tətbiq olunarkən ilk günlərdə 8103-ə göndərilən SMS-lərin 60 faizi təyinatına uyğun olmayan mətnlər idi. Nəticədə 8103 xətti yüklənir və digər zəruri müraciətlərin cavablandırılması gecikirdi. Bundan əvvəlki sərt kanatın rejimi dövründə gün ərzində 1 milyon SMS emal olunurdu, hər bir SMS-in orta cavablandırılması müddəti isə 20 saniyə idi. Maksimum 1 dəqiqə ərzində vətəndaşın müraciəti cavablandırılırdı. Onu da qeyd etmək istəyirəm ki, SMS icazə sistemindən sui-istifadə halları yolverilməzdir. Vətəndaşlardan hər zaman nümayiş etdirdikləri anlayışı yenidən göstərmələrini xahiş edirəm”, - deyə Ülvi Mehdiyev bildirib.
Bölmənin digər xəbərləri
