Bakı, 14 dekabr, AZƏRTAC

Şəxsiyyəti tarix yaratmır, şəxsiyyət tarixi yaradır. Ümummilli Lider Heydər Əliyev böyük bir tarix yaradan və dünya tarixində silinməz iz buraxmış böyük Lider və unudulmaz şəxsiyyətdir. Araşdırmalar sübut edib ki, şəxsiyyətlərin gücü, ağlı, cəsarəti, siyasi iradəsi və müdrikliyi mənsub olduğu xalqın, onun yaratdığı dövlətin həyatında əvəzedilməz rola malikdir. Ulu Öndərin birinci ixtisası memar olmasına baxmayaraq, o həm də müstəqil Azərbaycan dövlətinin memarı, qurucusu oldu. Onun memarı olduğu müstəqil Azərbaycan dövlətinin əsasları möhkəm, sarsılmaz və əbədidir. Bütün həyatını xalqının firavan gələcəyi və müstəqil Azərbaycan dövlətinin yaradılması naminə həsr etmiş Heydər Əliyev cismən 19 il aramızda olmasa da, mənən hər zaman xalqımızla bir yerdə olub. Onun qoyduğu ideologiya və dövlət siyasəti inkişaf etdirilərək Azərbaycanı qalib ölkəyə çevirib. Ulu Öndər Azərbaycan xalqının inamını, ümidini, sabahını, xoşbəxt gələcəyini özünə qaytardı, başımızı ucaltdı. Həmçinin bizi qürurlandırdı, dünyanın nəzərində yeni əzəmətli, mübariz bir Azərbaycan yaratdı.

Bu fikirləri Milli Məclisin deputatı Azər Badamov AZƏRTAC-a açıqlamasında deyib.

Deputat qeyd edib ki, Ümummilli Lider Heydər Əliyev sovet Azərbaycanına rəhbər təyin olunanda müstəqil dövlətimizin yaradılmasına çalışmağı qarşısına məqsəd qoymuşdu. Onun bacarığı, siyasi iradəsi və xalqın gələcəyini daima düşünməsi sovet Azərbaycanını qısa bir zamanda inkişaf etmiş respublikaya çevirmişdi.

“Ulu Öndər deyirdi: “Reallığı düzgün qiymətləndirən, keçmiş təcrübədən yaradıcılıqla istifadə edən, sosial-siyasi və iqtisadi problemlərin bütün spektrini, mürəkkəbliyini nəzərə alan, qəbul olunan qərarların mümkün nəticəsini öncədən görməyə imkan verən siyasi xətt hökmən uğur qazanmalıdır. Belə siyasət cəmiyyətin sabitliyinə, irəliyə doğru hərəkətinə və tərəqqisinə xidmət edir”.

Bundan əlavə, gələcəkdə dövlət müstəqilliyinin və təhlükəsizliyinin qarantı olan orduda xidmət edəcək hərbi kadrların hazırlanmasının əsası da sovetlər dönəmində qoyuldu. Tarix sübut etdi ki, güclü ordusu olmadan müstəqil dövlətlər öz ədalətli mövqeyini heç vaxt müdafiə edə bilməzlər. Belə ki, 90-cı illərin əvvəlində öz havadarlarından dəstək alan Ermənistan Azərbaycanın torpaqlarını sürətlə işğal etdi. Ulu Öndər Heydər Əliyevin 1993-cü ildə hakimiyyətə qayıdışından sonra ölkədəki hərbi birləşmələr bir komandanlıq altında birləşdirilərək nizami ordu yaradılmasının əsası qoyuldu.

1993-cü ilin dekabrından 1994-cü ilin yanvarın 6-dək davam etmiş və Heydər Əliyevin rəhbərliyi ilə aparılmış uğurlu Horadiz əməliyyatı sayəsində Füzuli rayonunun Horadiz qəsəbəsi və 20 kəndi işğaldan azad edildi. Bununla da Ermənistan atəşkəs sənədinə imza atmağa məcbur edildi. Hərbi uğursuzluqlarla üzləşdiyini və daha irəliləyə bilmədiyini görən təcavüzkar Ermənistanın rəhbərliyi danışıqlar masası arxasında oturmağa, cəbhə bölgəsində atəşkəsi nəzərdə tutan Bişkek protokolunu 1994-cü il mayın 8-də imzalamağa məcbur oldu. Protokol mayın 12-də qüvvəyə mindi və cəbhə xəttində aktiv hərbi əməliyyatlar həmin gündən dayandırıldı. Atəşkəsin əldə olunması Azərbaycanın iqtisadi inkişafının təmin edilməsi və ordu quruculuğu prosesinin uğurla aparılması baxımından mühüm bir mərhələ oldu.

“Atəşkəsə imza atılması Azərbaycana müstəqil dövlətin əsaslarını təşkil edən idarəetmə sistemini, güclü iqtisadiyyatını və ordusunu yaratması baxımından vacib idi. Amma qeyd etmək istəyirəm ki, yenicə müstəqilliyə qədəm qoymuş Azərbaycan dövlətinin mövcud iqtisadi əsasları AXC-Müsavat cütlüyünün hakimiyyəti zamanı talan edilərək məhv edilmişdi. Buna görə də hər şey sıfırdan başlanıldı. Başlanğıc üçün isə yeganə vasitə ölkəmizin karbohidrogen ehtiyatlarından səmərəli istifadəsi idi. Ulu Öndər Heydər Əliyev bilirdi ki, karbohidrogen ehtiyatlarından səmərəli istifadə olunması Azərbaycanın iqtisadiyyatını inkişafa və növbəti uğurlara apara biləcək. Ona görə də ölkəmizin neft-qaz sənayesinə xarici investisiyaların cəlb edilməsini və yenidən qurulmasını vacib məsələ kimi görən uzaqgörən Lider 8 ölkənin 11 aparıcı şirkətini Azərbaycana investisiya yatırmaq üçün inandıra bildi. Beləliklə, 1994-cü il sentyabrın 20-si tarixə “Əsrin müqaviləsi” kimi düşdü. Məhz bu sazişin imzalanmasından sonra ölkəmizin neft və qeyri-neft sektoruna xarici sərmayələr gəlməyə başladı, iqtisadiyyatımızın formalaşmasının əsası qoyuldu. Bütün bunlar ölkəmizə iqtisadi və siyasi müstəqillik qazandırdı”, - deyə A.Badamov vurğulayıb.

O bildirib ki, Ulu Öndərin müəllifliyi ilə 1995-ci il noyabrın 12-də ümumxalq səsverməsi yolu ilə Azərbaycan Respublikasının Konstitusiyası qəbul olundu. Konstitusiya dövlətin ali qanunudur. O dövlətin siyasi, hüquqi və iqtisadi sisteminin əsaslarını təsbit edir, ölkə vətəndaşlarının hüquq və azadlıqlarına zəmanət verir. Konstitusiyanın birinci maddəsində ölkəmizdə dövlət hakimiyyətinin yeganə mənbəyinin Azərbaycan xalqı olması qeyd olunub. 7-ci maddəsində isə Azərbaycan dövlətinin demokratik, hüquqi, dünyəvi və unitar respublika olduğu qeyd olunur. Beləliklə, Ümummilli Lider Heydər Əliyevin müəllifliyi ilə dövlətimizin hüquqi əsasları yaradıldı.

Milli Məclisin deputatı diqqətə çatdırıb ki, Ulu Öndər Heydər Əliyev dühası azərbaycançılığı milli ideologiyaya çevirməklə cəmiyyətin həmrəylik və bütövlüyünə, mənəvi birliyinə nail oldu. Onun azərbaycançılıq ideologiyası Prezident İlham Əliyev tərəfindən uğurla davam etdirilərək ölkədə və dünyada yaşayan azərbaycanlıların arasında milli həmrəylik və birliyi daha da möhkəmləndirdi. Bu milli həmrəylik və birliklə xalqımız 44 günlük Vətən müharibəsində “Dəmir yumruğ”a çevrilərək 30 il erməni işğalında qalmış torpaqları azad etdi.

O əlavə edib ki, Ümummilli Lider Heydər Əliyev deyirdi: “Arzu edirəm ki, sizinlə birlikdə gedək Şuşaya. Gedəcəyik, inanın ki, gedəcəyik. Şuşa Azərbaycanın gözüdür. Hər bir azərbaycanlı üçün iftixar nöqtəsidir. Şuşa bizim mədəniyyətimizin, tariximizin rəmzidir. Şuşa hamımız üçün əzizdir. Amma tək Şuşa yox. Laçın dağları da bizə əzizdir. Heç vaxt biz Laçınsız yaşaya bilmərik. Ağdam kimi gözəl bir şəhər, Füzuli, Cəbrayıl, Zəngilan, Qubadlı, Kəlbəcər, Kəlbəcərin bulaqları, Kəlbəcərin o İstisuyu. Biz onlarsız yaşaya bilmərik”. Beləliklə, Azərbaycan Müzəffər Ali Baş Komandan İlham Əliyevin rəhbərliyi ilə son 200 illik tarixdə ilk dəfə qalib ölkəyə çevrilməklə Ulu Öndərin son arzusunu da həyata keçirmiş oldu.

Müharibənin bitdiyi iki ildə işğaldan azad olunmuş ərazilər yenidən qurulur və bərpa olunur. Bununla belə, Şuşa “Türk dünyasının mədəniyyət paytaxtı” elan edildi. İşğaldan azad olunmuş yaşayış məntəqələrimiz “ağıllı” konsepsiyalar əsasında yenidən qurulur. Belə ki, Ağalıdan Böyük Qayıdışın həyata keçirilməsinə başlanılıb. İşğaldan azad olunmuş digər şəhər və kəndlərin də yenidən qurulması və bərpası işləri davam etdirilir.