DÜNYA
UNICEF Özbəkistana sosial müdafiənin gücləndirilməsi üçün 300-dən artıq ofis avadanlığı təqdim edib
![UNICEF Özbəkistana sosial müdafiənin gücləndirilməsi üçün 300-dən artıq ofis avadanlığı təqdim edib](/files/2021/1/1200x630/1612165773285423431_1200x630.jpg)
Daşkənd, 1 fevral, АZƏRTAC
BMT-nin Uşaq Fondu (UNICEF) və Özbəkistan Maliyyə Nazirliyi (MN) arasındakı texniki kömək çərçivəsində MN-in Büdcədənkənar pensiya fonduna 300-dən artıq ofis avadanlığı ayrılıb.
Avadanlığı UNICEF-in Özbəkistandakı nümayəndəliyinin rəhbəri, həmyerlimiz Munir Məmmədzadə bu ölkənin maliyyə nazirinin müavini Axadbek Xaydarova təqdim edib.
Görüşdə bildirilib ki, bu avadanlıqdan sosial müdafiə vahid reyestrinin, informasiya sisteminin təkmilləşdirilməsində istifadə olunacaq və avadanlıqlar ölkənin bütün vilayətlərindəki Büdcədənkənar pensiya fondunun rayon və şəhər bölmələri arasında bölünəcək.
Munir Məmmədzadə deyib: “Biz çox şadıq ki, Maliyyə Nazirliyinə verdiyimiz bu avadanlıqlar Vahid reyestrin fəaliyyətinin genişləndirilməsinə kömək edəcək, bu da ehtiyacı olan ailələrə və uşaqlara pul vəsaiti paylanmasının səmərəli idarə olunmasına gətirib çıxaracaq”.
Qulu Kəngərli
AZƏRTAC-ın xüsusi müxbiri
Daşkənd