Universitetlərdə ekoloji maarifləndirmə tədbirləri davam etdirilir
Bakı, 4 iyun (AZƏRTAC). “Təmiz Şəhər” ASC ali təhsil müəssisələrində ekoloji maarifləndirmə tədbirlərini davam etdirir.
ASC-nin mətbuat xidmətindən AZƏRTAC-a bildirmişlər ki, tədbirlərin keçirilməsində məqsəd tullantıların idarə olunması sahəsində tələbələrin biliklərinin artırılmasıdır.
Növbəti dəfə isə Bakı Dövlət Universitetinin coğrafiya fakültəsinin tələbələri üçün ətraf mühitin mühafizəsi və tullantıların idarəolunması mövzularında seminar keçirilmişdir. Seminarda Azərbaycan Respublikası Milli Məclisinin aparatının sektor müdiri Şamil Hüseynov, “EkoReal” təşkilatının direktoru Telman Zeynalov, Davamlı İnkişaf Araşdırmaları Mərkəzinin direktoru Nəriman Ağayev, “Təmiz Şəhər” ASC-nin ətraf mühit və əməyin mühafizəsi şöbəsinin müdiri Sabit Zeyniyev mühazirələr oxumuşlar.
Tələbələrə ətraf mühitin mühafizəsi sahəsində Milli Məclis tərəfindən qəbul olunmuş normativ hüquqi aktlar barədə məlumat verilmişdir. Eyni zamanda, “Təmiz Şəhər” ASC-nin gördüyü işlərə dair təqdimat keçirilmiş və bu barədə videoçarx nümayiş etdirilmişdir.
Bölmənin digər xəbərləri
