Vasif Hüseynov: Azərbaycan Ermənistanı ədalətli sülhə çağırır
Bakı, 14 yanvar, AZƏRTAC
Ermənistanın torpaqlarımızı işğal etdiyi ilk günlərdən etibarən bölgədə yaranmış xaos və qeyri-stabillik Cənubi Qafqazın hər üç xalqı üçün zərərli olub və minlərlə günahsız insanın qətli ilə nəticələnib. 2020-ci ildəki 44 günlük Vətən müharibəsi və 2023-cü ildəki antiterror tədbirləri bu münaqişəyə son qoyub, bölgəmizdə sülh və əmin-amanlıq üçün tarixi imkanlar yaradıb. Təəssüf ki, Ermənistan bu imkanlardan yararlanmaq əvəzinə iki dövlət arasında problemlərin davamı və qeyri-müəyyənliyin qorunub saxlanılması üçün çalışır. Əlbəttə ki, burda rəsmi İrəvanın məqsədi aydındır. Nikol Paşinyan hökuməti bu qeyri-müəyyən vəziyyətdən öz daxili və xarici maraqları üçün istifadə edir. Fransa kimi dövlətlər Cənubi Qafqazda hərbi və siyasi təsiri artırmaq üçün bəhanələr irəli sürür. Heç şübhəsiz ki, bu vəziyyət yaxın və orta vədədə Ermənistan xalqı üçün yeni problemlərin yaranmasına aparıb çıxaracaq.
Bunu AZƏRTAC-a açıqlamasında Beynəlxalq Münasibətlərin Təhlili Mərkəzinin (BMTM) şöbə müdiri Vasif Hüseynov söyləyib.
O qeyd edib ki, Azərbaycan keçən 30 il ərzində olduğu kimi, bu gün də Ermənistanı ədalətli sülhə çağırır. Regionda nəqliyyat və kommunikasiya xətlərinin çəkilməsini, Ermənistan-Azərbaycan dövlət sərhədinin delimitasiyasını, sülh müqaviləsinin imzalanmasının həm Azərbaycanın, həm də Ermənistanın maraqlarına cavab verəcək tərzdə həll olunmasına çağırır. Buna görədir ki, tərəflər arasında həllini gözləyən bir neçə məsələdə rəsmi Bakı beynəlxalq hüququn norma və prinsiplərini əsas götürən mövqe ifadə edir. Məsələn, son üç il ərzində gündəmdə olan ən vacib məsələlərdən biri olan Zəngəzur dəhlizi layihəsində ölkəmizin təklif etdiyi həll yolları beynəlxalq təcrübə və standartlara əsaslanır. Dövlətimizin rəsmiləri tərəfindən dəfələrlə elan olunub ki, digər təcrübələrdə, məsələn, Kalininqrad modelində tətbiq olunduğu prinsiplərə uyğun olaraq, Azərbaycandan Azərbaycana (Naxçıvana) gedən yüklər, vətəndaşlar və avtonəqliyyat vasitələri heç bir yoxlamadan keçmədən, gömrük inzibatçılığına cəlb edilmədən sərbəst keçməlidir, digər ölkələrə gedən yüklərə görə isə gömrük rüsumları ödənilməlidir. Bu, heç bir halda Ermənistanın suverenliyinə təhdid daşımır. Prezident İlham Əliyev dəfələrlə bəyan edib ki, Azərbaycan Ermənistanın ərazi bütövlüyünü tanıyır. Buna rəğmən bəzi radikal erməni qrupları tərəfindən bu bəyanatların Ermənistanın ərazi bütövlüyünə və suverenliyinə təhdid kimi irəli sürülməsi əlbəttə ki, növbəti bəhanədən başqa bir şey deyil.
“Oxşar şəkildə dövlət sərhədinin delimitasiyası və anklavların statusu məsələsində də rəsmi Bakı ədalətli həll yolları təklif edir. Ermənistan tərəfindən sovet illərində Azərbaycan torpaqlarının hissə-hissə qoparılmasından sonra hazırlanmış xəritələrin istifadə olunması, əlbəttə ki, Azərbaycan xalqı üçün qəbuledilməz bir haldır. Bizim tələbimiz ondan ibarətdir ki, delimitasiya prosesində əsas götürüləcək sənədlər tarixi ədalətə əsaslanmalıdır. Bu tələb Ermənistan tərəfindən hələ də işğalda saxlanılan Azərbaycan kəndlərinin statusunun müəyyən edilməsinə də aiddir. Yanvarın 8-də yerli televiziya kanallarına müsahibəsində, Prezident İlham Əliyev bu məsələdə ölkəmizin mövqeyini birmənalı və qətiyyətli formada ifadə etdi. Azərbaycan xalqı öz torpaqlarının işğalda olması faktı ilə heç vaxt barışmayıb və barışmayacaq. İşğalda olan kəndlərimiz Azərbaycan xalqına qaytarılmalı və o kəndlərlə stabil və təhlükəsiz əlaqə təmin edilməlidir”, - deyə Vasif Hüseynov əlavə edib.
Bölmənin digər xəbərləri
