SİYASƏT
“Veçerni Bişkek” qəzeti Azərbaycanın Müstəqillik Günündən yazıb
Bakı, 30 may, AZƏRTAC
“Veçerni Bişkek” qəzetində Azərbaycanın Qırğızıstandakı səfiri Lətif Qəndilovun Azərbaycanın Müstəqillik Gününə həsr olunmuş müsahibəsi dərc edilib.
AZƏRTAC xəbər verir ki, səfir müsəlman Şərqində birinci demokratik respublikanın yaranmasından, dövlətçilik sahəsində qısa müddət ərzində görülən işlərdən, eləcə də 71 il sonra Azərbaycanın müstəqilliyinin bərpasından söhbət açıb.
Lətif Qəndilov qeyd edib ki, müstəqillik illərində Heydər Əliyevin rəhbərliyi ilə siyasi və iqtisadi islahatlar aparılıb, hökumətin bütün demokratik təsisatları yaradılıb, xarici siyasətin əsas prinsipləri müəyyən edilib. Diplomat imzalanmış “Əsrin Müqaviləsi”nin Azərbaycanın sonrakı inkişafında həlledici amilə necə çevrilməsindən ətraflı danışıb. Səfir qeyd edib ki, Heydər Əliyevin siyasəti Prezident İlham Əliyev tərəfindən uğurla davam etdirilir, Prezident İlham Əliyevin rəhbərliyi ilə son 19 il ərzində dünya əhəmiyyətli layihələr həyata keçirilib.
L.Qəndilov əlavə edib ki, hazırda Azərbaycan Qoşulmama Hərəkatı forumları, Beynəlxalq Humanitar Forum, Mədəniyyətlərarası Dialoq üzrə Beynəlxalq Forum və s. kimi beynəlxalq tədbirlərin keçirildiyi məkana çevrilib. Son 20 il ərzində həyata keçirilən bütün bu siyasi, iqtisadi və humanitar layihələr Azərbaycana beynəlxalq ictimaiyyətin etibarlı və fəal üzvü imicini qazandırıb.
Diplomat 44 günlük Vətən müharibəsində Azərbaycanın qazandığı Qələbə mövzusuna da toxunaraq əlavə edib ki, hazırda Azərbaycan məcburi köçkünlərin bu ərazilərə qayıtması üçün zəruri tədbirlər görür: dağıdılmış şəhər və kəndləri öz gücü ilə bərpa edir. “Azərbaycan bu məsələni qəti həll etmək, Qarabağı dünyanın sülh və tərəqqi regionuna çevirmək niyyətindədir, nəqliyyat yollarının açılmasına və nəqliyyat dəhlizlərinin yaradılmasına tərəfdardır”, - deyə səfir bildirib.